18 январь куни Туркманистон президенти Гурбангули Бердимуҳамедов Ахал вилоятининг янги пойтахти қурилаётган ҳудудга текширув билан борди, деб хабар беради «Хроника Туркменистана». Бироқ давлат раҳбари ундан олдин «янги қулун туғилгани ҳақидаги хушхабарни» эшитиб, Халқаро ахалтака от спорти мажмуасига кириб ўтган.
Мажмуада Бердимуҳамедов йилқичилар билан гаплашган, уларнинг улкан меҳнати учун миннатдорчилик билдириб, бош йилқичининг илтимосига кўра, янги туғилган қулунга 2022 йил шиори — «Халқнинг Арқадоғ билан даври» шарафига «Замон» лақаби берилган.
Шу куни Бердимуҳаммедовнинг фармони билан «отчилик комплексларини модернизация қилиш, отларни сақлаш шароитларини ва селексия ишларини янада яхшилаш, от спорти ва чавандозлик санъатини ривожлантириш учун Барқарорлаштириш жамғармасидан маблағ ажратилган.
Шундан сўнг, Туркманистон президенти Ахал вилоятининг янги қурилаётган маъмурий марказига ташриф буюрган. Таъкидланишича, «ҳар жиҳатдан шаҳарсозлик дастури талабларига тўлиқ жавоб берадиган» янги шаҳарни қуриш ишлари 2019 йилда бошланган.
Бердимуҳамедов бинолар қопламалари ва бордюрларда ишлатиладиган материалларни, шунингдек, ўриндиқлар, чиқинди идишлари, ёритиш устунлари, стадионлардаги ўриндиқлар, 40 метрли «Ахал» монументи, ерусти йўлаклари, автобус бекатлари дизайнини тасдиқлаган.
Давлат раҳбари шундан сўнг, шаҳар қурилишига жалб этилган компаниялар раҳбарлари ва қурилишга масъул бош вазир ўринбосарлари иштирокида йиғилиш ўтказган.
Йиғилиш давомида йиғилганларга янги шаҳарда юқори турмуш даражасини таъминлаш, барча қурилиш ишларини ўз вақтида якунлаш бўйича топшириқ берган. Қурилиш ишлари учун давлат раҳбари мамлакатдаги олий таълим муассасаларининг талабаларини жалб этиш бўйича кўрсатма ҳам берган.
Маълумот учун, Ахал вилояти Туркманистон пойтахти — Ашхобод ўзининг бошқарув органлари билан алоҳида маъмурий бирлик бўлиб ажралиб чиққач пайдо бўлган.
Изоҳ (0)