«Сурхон» вакиллари ва унинг собиқ футболчилари ўртасида вужудга келган можаро бўйича маълумот берилди.
2021 йилнинг 21 сентябрь куни Ўзбекистон футбол ассоциацияси «Сурхон» бош директори Азамат Абдураҳмонов, клуб спорт директори Абдумажид Тоиров, футболчилар Асрор Ғофуров, Жавоҳир Эсонқулов ва Акром Хўжаев ўртасида вужудга келган жанжал бўйича вазиятга ҳуқуқни муҳофаза қилувчи органлар томонидан аниқлик киритилгунга қадар уларни футбол билан боғлиқ ҳар қандай фаолиятдан четлатган эди.
Ташкилот матбуот хизматининг ёзишича, мазкур вазият бўйича 2022 йилнинг 14 январида Тошкент шаҳар жиноят ишлар бўйича Мирзо-Улуғбек туман суди томонидан қарор қабул қилинган ва айбдорларга нисбатан Ўзбекистон Республикасининг Маъмурий жавобгарлик тўғрисидаги кодексининг тегишли моддаларига асосан жарима жазоси тайинланган. Тегишли маъмурий жазо чоралари кўрилганлиги сабабли уларга нисбатан қўлланилган футбол билан боғлиқ ҳар қандай фаолиятдан четлаштирилганлиги тўғрисидаги қарор 2022 йил 20 январь кунидан бошлаб бекор қилинди ва уларнинг футболдаги фаолиятига рухсат берилди.
Эслатиб ўтамиз, 18 сентябрь куни «Сурхон» собиқ футболчиси, 24 ёшли Жавоҳир Эсонқулов калтакланганлиги юзасидан тегишли органларга мурожаат қилгани тўғрисидаги видео тарқалганди. Эсонқуловнинг рафиқаси турмуш ўртоғи «Сурхон» клуби биносида гуруҳ бўлиб, «дубинка» билан калтакланганини маълум қилганди. Шундан сўнг Тошкент шаҳар ИИББ мазкур ҳолат юзасидан тергов бошлаган эди.
Изоҳ (0)