Toshkent shahar IIBB “Surxon” klubi vakillari va jamoaning sobiq futbolchilari o‘rtasidagi mushtlashuv yuzasidan tergov boshladi

Futbolchilar Javohir Esonqulov, Akrom Xo‘jayev va “Surxon” klubi vakillari o‘rtasida bo‘lib o‘tgan janjal yuzasidan Toshkent shahar IIBB tomonidan tergov oldi tekshiruvi o‘tkaziladi.

“17-sentabr kuni “Surxon” futbol klubi binosida sobiq futbolchilar J.E. va A.X. hamda jamoa sardori A.G. o‘rtasida futbolchilar bino devoriga rahbariyat nomiga haqoratli yozuvlar qoldirgani tufayli kelishmovchilik yuzaga kelgan. Shu kunning o‘zida Mirzo Ulug‘bek tumani IIO FMBga sportchilardan badan shikastlari yetkazilgani to‘g‘risida ariza kelib tushdi.

Mazkur fakt bo‘yicha tergov oldi tekshiruvi olib borilmoqda, sud-tibbiy ekspertizasi tayinlandi. Tekshiruv yakuni bo‘yicha qonuniy chora ko‘riladi”, — deyiladi IIBB bayonotida.

Avvalroq ijtimoiy tarmoqlarda Esonqulov “Surxon” klubining bir qator vakillari tomonidan do‘pposlangani haqida aytgan gaplari tasvirlangan video tarqaldi. Esqulovning rafiqasi turmush o‘rtog‘ini “Surxon” klubi binosida guruh bo‘lib, “dubinka” bilan urishgani haqida gapirdi.