Ўзбекистон Суперлигаси клублари 2022 йилги мавсумга тайёргарлик олиб бормоқда ва янги футболчиларни рўйхатдан ўтказмоқда. Қуйида Суперлига клубларига доир сўнгги хабарлар тақдим этилади.
«ОКМК» БААга жўнаб кетди
Тошкентда 5 январь куни тўпланган ва 2 ҳафта давомида пойтахтда машғулот ўтказган «ОКМК» тайёргарликнинг режасининг учинчи босқичини БААнинг Дубай шаҳрида ўтказади.
Клуб матбуот хизматининг ёзишича, жамоа Дубайда 20 январь—2 февраль кунлари йиғин ўтказиб, 2 та назорат ўйинини ўтказишни режалаштирган.
Шунингдек, «ОКМК» ярим ҳимоячи Шоҳрух Гадоев билан шартнома узайтирилганини маълум қилди. 2021 йили жамоага келган Гадоев яна 2 йил давомида Олмалиқ клуби шарафини ҳимоя қилади.
«Навбаҳор» Грузия чемпионатининг 2021 йилги мавсумдаги тўпурари билан шартнома имзолади
Янги мавсумга Туркиянинг Анталия шаҳрида тайёргарлик олиб бораётган «Навбаҳор» яна бир легионер футболчи билан шартнома имзолади.
Наманган матбуот хизматига кўра, сербиялик ҳужумчи Зоран Марушич 2022 йилги мавсумни «Навбаҳор»да бошлайди. Бироқ 29 ёшли ҳужумчи билан неча йиллик шартнома имзолангани ҳақида маълумот берилмаган.
Марушич фаолияти давомида Сербия, Босния ва Герцеговина, Беларусь ҳамда Грузия клубларида тўп сурган. У 2021 йилги мавсумни Тбилисининг «Динамо» таркибида ўтказиб, 41 та ўйинда 17 та гол 9 та ассистни амалга оширган ва Грузия чемпионати тўпурари бўлган. Шунингдек, футболчи ўтган мавсумда Грузия чемпионатининг энг яхши ҳужумчиси, энг яхши легионери ва энг яхши футболчиси деб топилган.
Transfermarkt портали Марушични 450 минг еврога баҳолаган.
«Пахтакор» Икром Алибоевни ўз сафига қўшиб олди
«Пахтакор» ярим ҳимоячи Икром Алибоевни ўз сафига қўшиб олди. Алибоев «шерлар» сафига эркин агент сифатида ўтди ва бир йиллик шартномага имзо чекди.
28 ёшли футболчи «Пахтакор» жамоаси тарбияланувчиси ҳисобланади. Фаолияти давомида Жанубий Кореянинг «Сеул» ва «Тежон Ситизен» жамоаларида тўп сурган. Ундан ташқари «Локомотив» шарафини ҳам ҳимоя қилган.
Суперлигага йўл олган «Нефтчи» етакчиси билан шартномани узайтирди
Илҳом Мўминжонов бошчилигида 2022 йилги мавсумни Суперлигада бошлайдиган «Нефтчи» Шерзод Каримов билан шартнома муддатини узайтирди.
Аммо Фарғона клуби ҳам шартнома муддатини ошкор қилмаган.
Шерзод Каримов «Пахтакор», «Локомотив», «Навбаҳор»даги ўйинлари орқали ўзбек мухлисларига яхши таниш.
Клуб матбуот хизмати, шунингдек, жамоа аъзоларининг 20 январь куни Туркиянинг Анталияга учиб кетганини маълум қилди. Фарғоналиклар у ерда тайёргарлик жараёнининг 21 кундан иборат иккинчи босқичига киришади.
Изоҳ (0)