2021-yil avgust oyida Afg‘onistonda hokimiyat tepasiga kelgan “Tolibon” harakati joriy yil 21-martdan boshlab, ya’ni yangi o‘quv yilidan mamlakat bo‘yicha qizlar uchun maktablar ochilishini va’da qildi. Bu haqda harakat rasmiy vakili, hukumat a’zosi Zabihullo Mujohidga tayanib TOLOnews telekanali xabar berdi.

Foto: BBC

Uning so‘zlariga ko‘ra toliblar hukumati qizlarning maktabda savod chiqarishiga qarshi emas, biroq ular qizlar o‘g‘il bolalardan alohida sinflarda tahsil olishi kerak deb hisoblaydi.

Mujohidning aytishicha, qizlar uchun maktablarning ochilishiga o‘g‘il bolalar uchun ham, qizlar uchun ham alohida sinfxonalar yetishmasligi to‘sqinlik qilgan.

“Kelasi o‘quv yili boshlangunicha mazkur muammolarni hal etishga harakat qilamiz”, — degan u.

Afg‘onistondagi maktablar faoliyati mamlakatda “Tolibon” vakillari hukumatni egallaganidan keyin to‘xtab qolgan. O‘tgan yili 19-sentabrda maktablar qayta ochilgan, biroq darslarga faqat o‘g‘il bolalar kiritilgan va ularga faqat erkak o‘qituvchilar dars bergan.

Keyinchalik ayrim viloyatlarda kichik, o‘rta va katta sinflar uchun ta’lim qayta boshlangan. Ayni vaqtda Afg‘onistonning 34 ta viloyatidan faqat 7 tasida qizlarning maktablarda ta’lim olishi uchun sharoitlar mavjud.

12-yanvarda toliblar hukumatida oliy ta’limga mas’ul rahbar Abdul-Boqi Haqqoniy yaqin vaqt ichida talaba yigitlar va qizlar uchun Afg‘oniston davlat universitetlari qayta ochilishini bildirgan. Biroq Haqqoniy bu aynan qaysi sanada amalga oshishiga aniqlik kiritmagan.

Avval Afg‘onistonning Xitoydagi elchisi olti oydan buyon maoshsiz ishlayotgani tufayli ishdan bo‘shagani, Afg‘oniston sharqida yuz bergan portlashda 9 nafar maktab o‘quvchisi halok bo‘lgani, “Tolibon” o‘zining Vazirlar Mahkamasi tarkibiga Afg‘onistonning ag‘darilgan hukumati a’zolarini kiritmasligi haqida xabarlar berilgan.