2021 йилнинг августида толиблар Кобулни қўлга киритганидан сўнг Ўзбекистон ва Тожикистонга бориб қолган Афғонистон ҳарбий-ҳаво кучлари самолётларини жойлаштириш масаласи ҳамон кўриб чиқилмоқда. Бу ҳақда Пентагоннинг расмий вакили Жон Кирби 18 январь куни бўлиб ўтган брифингда маълум қилди, деб хабар беради «Gazeta.uz».
Гап Афғонистон ҳарбийлари қўшни мамлакатларга қочиб ўтган самолёт ва вертолётлар ҳақида кетмоқда. Ўтган ҳафта Афғонистон муваққат ҳукумати мудофаа вазири вазифасини бажарувчи Муҳаммад Ёқуб авиатехникаларни қайтармаса Ўзбекистон ва Тожикистонни «бунинг оқибатлари кутаётганидан» огоҳлантирган эди.
«Биз ҳозирча мазкур вертолётларни жойлаштириш масаласи устида ишлаяпми. Менда улар бўйича қандай йўл тутилишига оид сўнгги маълумотлар мавжуд эмас. Бироқ мен ишонч билан айта оламанки, улар ‘Толибон’ фойдаланиши учун Афғонистонга қайтарилмайди», — дейди Жон Кирби.
Январь ойи бошида «Толибон» муваққат ҳукумати матбуот котиби ўринбосари Имонулла Саманганий Тошкент ва Душанбе билан вертолётларни қайтариш бўйича музокаралар олиб борилаётганини маълум қилган эди.
Эслатиб ўтамиз, 16 август куни Ўзбекистон Бош прокуратураси (кейинроқ охирига қадар текширилмагани маълум қилинган) мамлакат ҳаво маконини ичида 585 нафар афғон ҳарбий хизматчиси бўлган 22 та ҳарбий самолёт ва 24 та вертолёт кесиб ўтгани тўғрисида хабар берилганди. Кузатув давомида Embraer-314 ва МиГ-29 самолётлари тўқнашиб, Сурхондарё вилоятининг Шеробод тумани ҳудудига қулаган. Октябрь охирида Афғонистонни қайта тиклаш бўйича бош инспектори (SIGAR) ҳисоботида толиблар томонидан ағдарилган ҳукуматнинг Ҳарбий ҳаво кучларига тегишли ҳарбий самолётларнинг чорак қисми Ўзбекистон ва Тожикистонда экани маълум қилинганди. «Толибон» Афғонистонни эгаллагунга қадар мамлакат ҳарбий авиациясида 160 та самолёт бўлган.
Изоҳ (0)