Украина президенти Владимир Зеленский 19 январь куни АҚШ давлат котиби Энтони Блинкен билан учрашди, деб хабар беради «Интерфакс». Таъкидланишича, томонлар Украинанинг Евроатлантикага интилишларини муҳокама қилган.
«Мазкур учрашув АҚШ мустақиллигимиз ва суверенитетимизни кучли қўллаб-қувватлашини яна бир бор таъкидлайди ҳамда Украина бўйича ҳеч қандай қарор Украинасиз қабул қилинмаслиги ҳақидаги асосий тамойилни яна бир бор тасдиқлайди», — дея давлат раҳбарининг матбуот хизмати Зеленскийдан иқтибос келтиради.
Маълум қилинишича, Зеленский давлат котиби орқали АҚШ президенти Жо Байденга Қўшма Штатлар томонидан хавфсизлик билан боғлиқ чақириқлар фонида кўрсатаётган ёрдами учун миннатдорчилик билдирган.
Президент офисининг хабар беришича, суҳбат чоғида томонлар Украинадаги хавфсизлик билан боғлиқ вазият ва мавжуд музокара форматлари доирасида кўрилган чоралар, шунингдек, вазиятни сиёсий ва дипломатик тартибга солишнинг бошқа усуллари юзасидан фикр алмашган.
«Биз музокараларнинг барча форматини фаоллаштиришни ва Норманд саммитини ўтказишга йўл очишни истаймиз», — дейди Зеленский.
«Украина президенти тинчликка эришиш учун зарур барча ишни қилишини қайд этди. Бунинг учун Украина қатор ташаббусларни илгари сурган, жумладан, улар уч томонлама алоқа гуруҳи доирасига киритилган», — дейилади хабарда.
Шунингдек, учрашув давомида хавфсизлик ва мудофаа соҳасидаги икки томонлама алоқалар ҳам батафсил муҳокама қилинган. Жумладан, президент Украина Қуролли кучлари имкониятини яхшилаш бўйича Америка ёрдамининг кучайтирилаётгани муҳимлигини таъкидлаган. «Тезкор қадам ташлаш учун армияни модернизация қилишга ёрдам керак, айниқса, ҳозиргидек қийин даврда», — дейди давлар раҳбари.
У, шунингдек, Евроатлантика интилишларини қўллаб-қувватлаш масаласини, хусусан, Украинанинг Мадриддаги НАТО саммитидан кутаётганини кўтариб, Россия Федерациясига қарши профилактик санкциялар жорий этиш зарурлигини таъкидлади.
Шунингдек, у евроатлантик интилишларини қўллаб-қувватлаш, хусусан, Украина НАТОнинг Мадриддаги саммитидан нималарни кутаётганига оид масалани кўтарган ва Россияга нисбатан огоҳлантирувчи санкциялар жорий этиш зарурлигини кўрсатган.
Бундан ташқари, Зеленский «Шимолий оқим-2» геосиёсий қурол экани ва Украина ҳамда Европа энергетика хавфсизлигига таҳдид туғдиришини таъкидлаган. Суҳбатдошлар, шунингдек, Украинадаги ўзгаришларни амалга оширишнинг ҳозирги ҳолатини муҳокама қилган ва ички сиёсий вазиятга оид масалаларни кўтарган.
Эслатиб ўтамиз, Украина билан чегарада Россия қўшинларининг тўплангани ҳақидаги маълумотлар октябрь ойида Ғарб ОАВларида пайдо бўлишни бошлаган. Ноябрь ойи ўрталарида Украина президенти Владимир Зеленский чегарада 100 минг Россия қўшини борлигини маълум қилган. АҚШ Давлат котиби ўринбосари Виктория Нуланд Россиянинг Украинага «бостириб кириши» 2022 йил бошида содир бўлиши мумкинлигини айтган.
Москва бу маълумотларни рад этиб, Украинадаги ҳарбий ҳаракатларга тайёргарлик ҳақидаги хабарларни «қуруқ, асоссиз кескинлик» деб атамоқда. Қолаверса, Россия Ғарб давлатларидан НАТОнинг шарққа томон кенгаймаслиги, Украина эса бу ташкилотга қабул қилинмаслиги ҳақида кафолат талаб қилган.
Изоҳ (0)