Xalqaro mehnat tashkiloti (XMT) 2021-yil avgustda Afg‘onistonda hukumat tepasiga “Tolibon” kelganidan so‘ng yarim milliondan ortiq odam ishsiz qolganini ma’lum qildi, deb xabar beradi “Interfaks”.
“Gap faqat uchinchi chorakdagi statistika haqida ketmoqda. XMT ekspertlari joriy yilning o‘rtalariga borib ushbu ko‘rsatkich 900 mingga yetishidan xavotirda”, — deyiladi BMT saytiga joylashtirilgan xabarda.
Ta’kidlanishicha, ishsizlik darajasining bu qadar ortishiga ayollar bandligiga qo‘yilgan cheklovlar va ko‘plab davlat xizmatchilarining ishdan bo‘shatilishi, shuningdek, og‘ir iqtisodiy inqiroz sabab bo‘lmoqda.
XMT ekspertlarining ma’lumotlariga ko‘ra, agar Afg‘oniston iqtisodiyotida ishlagan soatlar soni bo‘yicha mehnat bozoridagi yo‘qotishlar hisobga olinadigan bo‘lsa, u holda 2021-yilning uchinchi choragida hokimiyat o‘zgarmagandagi gipotetik ssenariyga nisbatan nisbatan 13 foizni tashkil etgan.
“Inqiroz eng ko‘p ayollarga zarar yetkazdi. Chunki shundoq ham jahon standartlari bo‘yicha ularning past bo‘lgan bandlik darajasi o‘tgan yilning uchinchi choragida 16 foizga tushib ketdi. 2022-yil o‘rtalariga borib, ushbu ko‘rsatkichning qulashi 28 foizga yetishi kutilmoqda”, — deyiladi xabarda.
Shu hafta BMT ekspertlar guruhi mamlakatda ayollar mehnati huquqi buzilayotganidan qattiq tashvishda ekanini bildirgandi. Ularning so‘zlariga ko‘ra, toliblar ayollarga ish joyiga qaytishni, shuningdek, erkak kishi hamrohligisiz jamoat joylarida yurishni taqiqlagan. Mamlakatda Xotin-qizlar ishlari vazirligi tugatilib, Afg‘oniston Inson huquqlari bo‘yicha mustaqil komissiyasi binolari tortib olingan.
Avvalroq Afg‘onistonning G‘azni viloyatida “Tolibon” hukumatining mulozimlari shifokorlarga erkaklar hamrohligisiz qabuliga kelgan ayollarni davolashni taqiqlagandi. Ilgari ayollar kasalxonalarga qarindoshlari hamrohligida kelishi mumkin edi. Biroq “Tolibon” komissiyasi ayollarning erkaklar boshchiligisiz kasalxonaga borishini “noqonuniy va axloqsiz” deb topdi. Shifokorlarga bunday bemorlarga yordam bermaslik, kasalxonaga yotqizmaslik talabi qo‘yilgan.Aamaj News agentligi “Tolibon” harakati a’zolari Kobul ko‘chalarida qolgan yuzi ochiq ayollarning suratlarini yo‘q qilishni boshlagani haqida xabar bergandi. Shuningdek, “Tolibon” ayollar ishtirok etgan bir qator teledasturlarni efirga uzatishni taqiqlagandi.
Izoh (0)