750 мингдан 17 млн сўмгача. Қатар бўлиб ўтадиган ЖЧ—2022 чипталари нархи эълон қилинди

ФИФА 2022 йилги Жаҳон Чемпионати учун чипталар сотувининг биринчи босқичини эълон қилди.

ФИФАнинг расмий сайтида чипталар учун ариза бериш 8 февралга қадар давом этади, мухлислар чипта хариди учун қайси куни ариза топширишининг аҳамияти йўқ. Агар аризалар сони мавжуд ўринлар сонидан ошиб кетса, қуръа ташлаш орқали чипта эгаси аниқланади.

Чипталар 4 тоифага бўлинган: битта ўйин учун, алоҳида жамоалар ўйини учун, 4 та турли стадионлардаги ўйинлар учун ва имконияти чекланган шахслар учун.

Чет эллик мухлислар учун гуруҳ босқичи ўйинлари чиптаси 250 дан 800 Қатар риалини (69 доллардан 220 долларгача ёки 745 872 сўмдан 2 378 142 сўмгача) ташкил этади. Маҳаллий мухлислар учун — 40 риал (11 доллар ёки 118 907 сўм). Финал ўйини маҳаллий мухлислар учун 750 риал (206 доллар ёки 2 226 806 сўм), чет эллик мухлислар учун эса чипта нархи — 2200 дан 5850 риалга қадар (604 доллардан 1600 долларгача ёки 6 529 082 сўмдан 17 295 584 сўмгача).

Чипталар сотувининг иккинчи босқичи 1 апрелда ўтказиладиган Жаҳон Чемпионати қуръасидан аввал бўлиб ўтиши режалаштирилган. Мухлислар чипталарни жонли навбат орқали сотиб олиш имконига ҳам эга бўлади. Сотувнинг кейинги босқичлари эса қуръадан сўнг бўлиб ўтади.