Ўзбекистон профессионал футбол лигаси ҳамда Ўзбекистон футбол ассоциацияси 2022 йилги мавсум тақвим режаси бўйича келишиб олди. Янги мавсумга 10 февраль куни қуръа ташланади. Бу ҳақда ПФЛ расмий сайтида хабар берилди.
Қайд этилишича, учрашувлар саналарига ойдинлик киритилиши учун ОФК тақвим режасини кутишга тўғри келган. Ҳозирда Чемпионлар Лигаси, ОФК Кубоги, Осиё чемпионати U-23, Осиё Кубогининг саралаш мусобақалари қайси саналарга тўғри келиши маълум бўлиб улгурган.
Мавсум одатга кўра Суперкубок учрашуви билан старт олади. Ўзбекистон чемпиони сифатида «Пахтакор» Кубокнинг амалдаги соҳиби «Насаф» билан тўқнаш келадиган Суперкубок баҳси 27 февраль, якшанба куни бўлиб ўтади. Ҳозирча ўйин қаерда ўтказилиши номаълум.
Суперлига эса 2 март санасидан эътиборан старт олади. Чемпионлар Лигасида Ўзбекистон шарафини ҳимоя қилаётган клуб(лар) гуруҳ босқичи учрашувларида иштирок этаётган бир вақтда қолган жамоалар Ўзбекистон Кубогининг гуруҳ босқичида қатнашади.
Шунингдек, ПФЛ мусобақаларнинг биринчи давра тақвимини ҳам эълон қилди.
Янада кўпроқ футбол ва спорт янгиликларидан boxабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)