Ўзбекистон футбол ассоциация раҳбарияти 18 январь куни Италиянинг «Рома» клуби вакили Карлос Перез билан учрашув ўтказди, деб ёзмоқда ташкилот матбуот хизмати.
Учрашувда ЎФА вакиллари Ўзбекистонда «Рома» клуби академиясини ташкил этиш имкониятларини ўрганиш борасида фикр билдирган Ўзбекистонлик иқтидорли футболчилар ҳамда мураббийларни Италияда малака ошириш ва тажриба алмашишини йўлга қўйиш масаласи муҳокама этилди. Европада мавқейи юқори ҳисобланган «Рома» клубининг маркетинг тизимини ҳам ўрганиб чиқиб, мамлакатда татбиқ этиш таклифи илгари сурилган.
Бундан ташқари, Элдор Шомуродов каби Ўзбекистоннинг етакчи футболчиларининг хорижий клублардаги фаолиятига оид махсус фильмлар тасвирга олиш кераклиги, бу ёш футболчиларнинг мотивациясини ошириш, ўз устида ишлаш, профессионалликка интилиш, иродали бўлиб етишишига туртки бўлиши мумкинлигини таъкидланди.
Шунингдек, мазкур учрашувда спорт тадбирларини ташкил этиш, менежмент, маркетинг каби бир қатор йўналишларда дунёнинг етакчи компанияларидан ҳисобланган International Management Group вакиллари ҳам иштирок этди.
Эслатиб ўтамиз, «Рома» 2021 йилнинг ёзида 17,5 миллион евро эвазига «Женоа»дан Элдор Шомуродовни сотиб олган. Элдор 2021/22 йилги мавсумда «Рома» сафида барча мусобақаларда 26 ўйин ўтказиб, 3 та гол ва 5 та голли узатмани амалга оширди.
Изоҳ (0)