Олий Мажлис Сенатининг Хотин-қизлар ва гендер тенглик масалалари қўмитаси томонидан аёлларни қўллаб-қувватлаш масалалари юзасидан онлайн шаклдаги видео мулоқоти бўлиб ўтди. Бу ҳақда парламент юқори палатаси матбуот хизмати хабар берди.
Мулоқот давомида маълум қилинишича, сўнгги уч йилда иқтисодий фаол аёллар сони 10 фоизга ошган. Давлат ташкилотларида ишлаётганларнинг 42,7 фоизини аёллар ташкил этмоқда. Мамлакатда хотин-қизлар тадбиркорлигини қўллаб-қувватлаш бўйича олиб борилаётган ишлар натижасида улар томонидан 130 мингга яқин тадбиркорлик субъекти самарали бошқариб келинмоқда. Якка тартибдаги тадбиркорларнинг қарийб 40 фоизи хотин-қизлардан иборат.
Таъкидланишича, 2021 йилнинг 13-15 октябрь кунлари Сенат раиси Танзила Норбоева бошчилигидаги мамлакат делегацияси Санкт-Петербург шаҳрида бўлиб ўтган учинчи Евросиё аёллар форумида иштирок этган. Унда билдирилган таклифлар ва келишувларни татбиқ этиш бўйича амалий чора-тадбирлар режаси юзасидан «йўл харитаси» тасдиқланиб, унга кўра Ўзбекистоннинг хотин-қизлар бандлигини таъминлаш ва тадбиркорлигини ривожлантириш бўйича тажрибасини халқаро кенг тарғиб этиш ҳамда бу борада тақдимот тайёрлаш вазифаси юклатилган.
Муҳокамалар давомида ушбу тақдимот материалларини тайёрлаш юзасидан масъулларга сўнгги 3 йил давомида мамлакатда хотин-қизлар бандлигини таъминлаш ва тадбиркорлигини ривожлантириш бўйича амалга оширилган ишлар, илғор тажрибалар ҳақида маълумотларни умумлаштириш, таҳлил этиш ва белгиланган муддатларда ишчи гуруҳга тақдим этиш вазифаси топширилган.
Аввалроқ Ўзбекистонда «Йил аёли» танлови ғолиблари ва гендер тенглиги учун курашган энг фаол ташкилотлар аниқлангани тўғрисида хабар берилганди.
Изоҳ (0)