Олий Мажлис Қонунчилик палатасининг Аграр ва сув хўжалиги масалалари қўмитаси «Янги Ўзбекистоннинг 2022–2026 йилларга мўлжалланган тараққиёт стратегияси тўғрисида»ги президент фармони лойиҳаси муҳокамасига бағишланган семинар ўтказди. Бу ҳақда парламент қуйи палатаси матбуот хизмати хабар берди.
Таъкидлаш керакки, Тараққиёт стратегияси лойиҳасининг 30, 31 ва 32-мақсадларида қишлоқ хўжалиги соҳасини жадал ривожлантириш бўйича муҳим вазифалар ўрин олган. Хусусан, қишлоқ хўжалигини илмий асосда интенсив ривожлантириш орқали деҳқон ва фермерлар даромадини камида 2 баравар ошириш, қишлоқ хўжалигининг йиллик ўсишини камида 5 фоизга етказиш кўзда кутилган.
Шунингдек, сув ресурсларидан самарали фойдаланиш ҳисобига ҳар йили камида 7 миллиард куб метр сувни иқтисод қилиш, сув хўжалиги объектларида электр энергияси истеъмолини 7,3 миллиард киловатт/соатдан 6,9 киловатт/соатгача камайтириш, сув хўжалиги объектларини давлат-хусусий шериклик тамойиллари асосида бошқариш мақсад қилинган.
Тараққиёт стратегиясини 2022 йилда амалга ошириш бўйича «Йўл харита»да юқоридаги 3 та мақсадларнинг бажарилишини таъминлаш юзасидан 18 та тадбир белгиланган ва булар 41 та амалга ошириш механизмлари орқали ижро этилиши назарда тутилган.
Семинарда мазкур ҳужжатда белгиланган вазифаларни амалга ошириш орқали пахтадан ўртача 40-45 центнер, ғаллани 70-75 центнер, 200 минг гектар пахта ва ғалла майдонларида лазерли текислашни жорий қилиш, 110 та мева-сабзавотчилик ва 35 та ғаллачилик кластерлари фаолиятини йўлга қўйиш назарда тутилаётгани қайд этилган.
Шу билан бирга, 75 минг гектар интенсив боғ ва янги узумзорлар барпо этиш, 129 минг гектар ерларни фойдаланишга киритиш, сув тежовчи технологияларни 260 минг гектарда жорий этиш, чорва озуқа майдонини 722 минг гектарга етказиш мақсад қилингани таъкидланган.
Якунда депутатлар томонидан фармон лойиҳаси бўйича бир қатор таклифлар билдирилиб, қўмитанинг тегишли қарори қабул қилинган.
Эслатиб ўтамиз, Шавкат Мирзиёев 2019 йил 5 ноябрда ўтказилган йиғилишда хорижий мутахассислар кўмагида ташкил этилган Сурхондарё тажрибаси асосида 55 та туманни экспортбоп мева-сабзавот маҳсулотлари турини етиштиришга ихтисослаштириш вазифасини қўйганди. Шунингдек, президент томонидан 2019 йил 9 декабрь куни ўтказилган йиғилишда мамлакатда мева-сабзавотчиликда кластер тизимини йўлга қўйиш бўйича топшириқ берилган. 2020 йилда эса Ўзбекистонда 2021 йил охиригача 3 минг гектар интенсив боғ яратилиб, 2,5 мингта оилага бўлиб берилиши маълум бўлганди.
Изоҳ (0)