«Оҳангаронцемент» цемент заводининг асосий аксионерлари ўз улуши сотилишини эълон қилди. Бу ҳақда фонд биржаси маълумотларига таяниб, «Gazeta.uz» хабар берди.
13 январь куни Кипрдаги Lamaka Enterprises Limited умумий қиймати 1,61 триллион сўм бўлган — ҳар бир акцияси 390 минг сўмдан 4,14 миллион дона акция (завод умумий акциясининг 84,3 фоизи) сотилишини маълум қилди. Офшор компанияси акциялар пакетини 2021 йил май охирида 557,68 миллиард сўмга сотиб олганди.
Британия Виргин оролларидан бўлган Giacinttar Limited 271 миллиард сўмга 694,9 минг дона (14,1 фоиз) акцияларини сотишни режалаштирмоқда.
Иккала компания томонидан сотувга қўйилган акциялар пакети (98,36 фоиз) 1,88 триллион сўмга баҳоланмоқда.
10 январь куни Telegram’даги «КорпИнфо» канали Akkermann Cement CА компанияси «Оҳангаронцемент» АЖ афилланган шахслари рўйхатига киритилгани тўғрисида ёзганди. Усолсев Юрий Александрович «Оҳангаронцемент» АЖ бош директори этиб тайинланган. У айни бир пайтда Akkermann Cement CА МЧЖ раҳбари ҳамдир. Мазкур жамият тўлиғича Россиянинг «Аккерманн Цемент» компаниясига тегишли. Мазкур компанияга «Юэсэм Цемент», унга эса ХК «Юэсэм» (USM Holding) эгалик қилади. Бу холдингнинг асосчиси ва асосий акциядори Алишер Усмоновдир.
«Оҳангаронцемент» ҳақида
«Оҳангаронцемент»га ХХ асрнинг ўрталарида асос солинган. 1970 йилларда комбинатга, 1980 йилларда эса ишлаб чиқариш бирлашмасига айланган. 1994 йилда завод хусусийлаштирилган ва акциядорлик жамиятига айлантирилган. Корхонага узоқ вақт давомида Зеромах эгалик қилган ва Россиянинг «Евроцемент»и 2006 йилда 75,5 фоиз акциясини сотиб олган. Кейинчалик ушбу улуш 83,9 фоизга қадар оширилган.
Spot’нинг ёзишича, 2014 йилда корхона муаммоларга дуч келган — ҳозирда фаолияти тугатилган Давлат рақобат қўмитаси 1994 йилдаги хусусийлаштиришни ноқонуний деб топишни талаб қилган, Тошкент вилояти иқтисодий суди заводнинг мулки ва банк ҳисобрақамларига ҳибс қўйган. Бундан ташқари, корхонадан солиқларни тўлаш талаб этилган. Бир нечта суд эшитувлари ва апелляциялардан сўнг томонлар масалани келишиб олишга муваффақ бўлган.
«Оҳангаронцемент» мамлакатдаги энг йирик солиқ тўловчилар қаторига киради, шунингдек, бозордаги етакчи компаниялардан бири ҳисобланади. 2019 йил якунларига кўра, заводнинг соф фойдаси 179,8 миллиард сўмни ташкил этган, 2020 йилнинг 9 ойида эса 187,1 миллиард сўм, 2021 йилнинг биринчи чораги якунлари бўйича — 24,8 миллиард сўм.
Изоҳ (0)