Bugun,

  • USD 11095.31
  • RUB 173.84
  • EUR 10772.44

26-yanvar kuni Toshkentda “Yil ayoli—2021” respublika tanlovi g‘oliblarini taqdirlash marosimi bo‘lib o‘tdi. Bu haqda Oliy Majlis Senati matbuot xizmati xabar berdi.

Foto: Senat matbuot xizmati

Ma’lum qilinishicha, Gran-pri va “Yil ayoli” unvonini Qoraqalpog‘iston Respublikasi Kegeyli tumanidagi “Orzu” fermer xo‘jaligi rahbari Palzada Saliyeva qo‘lga kiritgan. Unga avtomobil kaliti prezident sovg‘asi sifatida topshirilgan.

Ta’kidlanishicha, Palzada Saliyeva fermer xo‘jaligini boshqaribgina qolmay, yig‘im-terim jarayonida bevosita ishtirok etib, traktor haydamoqda.

Shuningdek, tanlovning uchta g‘olibasi ham aniqlangan:
  • 1-o‘rin — Samarqand davlat tibbiyot instituti 2-son Otorinolaringologiya kafedrasi mudiri, tibbiyot fanlari doktori, dotsent, Mahzuna Nasriddinova;
  • 2-o‘rin — Buxoro viloyati Ichki ishlar boshqarmasi Huquqbuzarliklar profilaktikasi boshqarmasi boshlig‘i o‘rinbosari, xotin-qizlar masalalari bo‘yicha bo‘limi boshlig‘i, podpolkovnik Dilfuza Sharopova;
  • 3-o‘rin — Qashqadaryo viloyati, Shahrisabz shahri, “Mevazor-Saodat” ishlab chiqarish kooperativi boshlig‘i Saodat Nizomova.

Mahzuna Nasriddinova

Mahzuna Nasriddinova
Foto: Senat matbuot xizmati

Ikkinchi va uchinchi o‘rinni qo‘lga kiritgan ayollarga 10 million, birinchi o‘rin sohibasiga esa 20 million so‘mlik bank vaucheri topshirilgan.

Foto: Senat matbuot xizmati

Senatning qayd etishicha, “Yil ayoli” ko‘rik-tanlovi mamlakatni ijtimoiy-iqtisodiy rivojlantirishga salmoqli hissa qo‘shayotgan, turli sohalarda mehnat qilayotgan, “oilada va farzand tarbiyasida o‘rnak bo‘layotgan”, jamiyat hayotida faol ishtirok etuvchi xotin-qizlarni qo‘llab-quvvatlash maqsadida o‘tkazilmoqda.

Mazkur tanlov mulkchilik shaklidan qat’i nazar, korxona, tashkilot, muassasalarda ishlovchi ayollar, shuningdek, uy bekalari ishtirok etishlari mumkin.

Bundan tashqari, “Gender tenglik faoli” g‘oliblari ham aniqlangan.
  • “Gender tenglikni ta’minlashda eng faol huquqni muhofaza qiluvchi organ” — Adliya hamda Ichki ishlar vazirliklari
  • “Gender tenglikni ta’minlashda eng faol davlat organi” — Mudofaa vazirligi;
  • “Gender tenglikni ta’minlashda eng faol hokimlik” — Samarqand viloyati hokimligi;
  • “Gender tenglikni ta’minlashda eng faol tashkilot” — Olmaliq tog‘-kon metallurgiya kombinati;
  • “Gender tenglikni ta’minlashda eng faol NNT” — “To‘maris” ayollar va yoshlar markazi;
  • “Gender tenglikni ta’minlashda eng faol tadbirkorlik subyekti” — “Shovot tekstil” MChJ
  • “Gender tenglikni targ‘ib qilishga qaratilgan eng yaxshi radio dastur” — Qoraqalpog‘iston teleradiokanali bosh muharriri Gulnaz Nurbekova;
  • “Gender tenglikni targ‘ib qilishga qaratilgan internetdagi eng yaxshi veb-sayt” — “O‘zsanoatqurilishbanki” sayti;
  • “Gender tenglikni targ‘ib qilishga qaratilgan internetdagi eng yaxshi axborot portal” — “Human.uz” axborot portali jurnalisti Nargiza Yunusova.

Foto: Senat matbuot xizmati

Foto: Senat matbuot xizmati

Izoh
Asosiy yangiliklar
Mahalliy
Xitoy Farg‘onada biochiqindilardan energiya olish bo‘yicha loyihani amalga oshirishi mumkin
Mahalliy
Qashqadaryoda tuman hokimi ro‘zadorlarni suv ichishga majburlagani aytilmoqda 
Mahalliy
“O‘zgidromet” kelayotgan hafta boshida qanday ob-havo bo‘lishini ma’lum qildi