Oliy Majlis Senatining Xotin-qizlar va gender tenglik masalalari qo‘mitasi tomonidan ayollarni qo‘llab-quvvatlash masalalari yuzasidan onlayn shakldagi video muloqoti bo‘lib o‘tdi. Bu haqda parlament yuqori palatasi matbuot xizmati xabar berdi.
Muloqot davomida ma’lum qilinishicha, so‘nggi uch yilda iqtisodiy faol ayollar soni 10 foizga oshgan. Davlat tashkilotlarida ishlayotganlarning 42,7 foizini ayollar tashkil etmoqda. Mamlakatda xotin-qizlar tadbirkorligini qo‘llab-quvvatlash bo‘yicha olib borilayotgan ishlar natijasida ular tomonidan 130 mingga yaqin tadbirkorlik subyekti samarali boshqarib kelinmoqda. Yakka tartibdagi tadbirkorlarning qariyb 40 foizi xotin-qizlardan iborat.
Ta’kidlanishicha, 2021-yilning 13-15-oktabr kunlari Senat raisi Tanzila Norboyeva boshchiligidagi mamlakat delegatsiyasi Sankt-Peterburg shahrida bo‘lib o‘tgan uchinchi Yevrosiyo ayollar forumida ishtirok etgan. Unda bildirilgan takliflar va kelishuvlarni tatbiq etish bo‘yicha amaliy chora-tadbirlar rejasi yuzasidan “yo‘l xaritasi” tasdiqlanib, unga ko‘ra O‘zbekistonning xotin-qizlar bandligini ta’minlash va tadbirkorligini rivojlantirish bo‘yicha tajribasini xalqaro keng targ‘ib etish hamda bu borada taqdimot tayyorlash vazifasi yuklatilgan.
Muhokamalar davomida ushbu taqdimot materiallarini tayyorlash yuzasidan mas’ullarga so‘nggi 3 yil davomida mamlakatda xotin-qizlar bandligini ta’minlash va tadbirkorligini rivojlantirish bo‘yicha amalga oshirilgan ishlar, ilg‘or tajribalar haqida ma’lumotlarni umumlashtirish, tahlil etish va belgilangan muddatlarda ishchi guruhga taqdim etish vazifasi topshirilgan.
Avvalroq O‘zbekistonda “Yil ayoli” tanlovi g‘oliblari va gender tengligi uchun kurashgan eng faol tashkilotlar aniqlangani to‘g‘risida xabar berilgandi.
Izoh (0)