HBO Max ва CNN Алексей Навальний ҳақида ҳужжатли фильм тасвирга олди

HBO Max ва CNN Films компаниялари россиялик сиёсатчи Алексей Навальний ҳақида «Навальний» номли ҳужжатли фильмни суратга олди, деб хабар беради Deadline.

Фильмда сиёсатчининг заҳарланиши, даволаниши ва Россияга қайтиши ҳақида ҳикоя қилинади. Картинага ҳужжатли фильмлар бўйича мутахассис канадалик Дэниэл Роэр режиссёрлик қилган. У ўз ишини «бир инсон тақдири ва унинг авторитар режимга қарши кураши» дея таърифлаган.

Фильм қачондан бошлаб намойиш этилиши ҳозирча номаълум. Алексей Навальнийнинг Instagram’даги саҳифасида айтилишича, картинанинг жаҳон премьераси «тез орада бўлиб ўтади».

Фильм HBO Max стриминг сервиси орқали намойиш этилади. Россияда ундан фойдаланишнинг имкони йўқ; ушбу сервиснинг асосий контентини «Амедиатека» кўрсатади.

Маълумот учун, мухолифатчи Алексей Навальний 2021 йилнинг 17 январь куни Россияга Германиядан қайтиб келди, у ерда қарийб беш ой давомида бўлиб, «Новичок» билан заҳарланганидан кейин даволанди. Тарафдорлари уни кутиб олиш учун Внуково аэропортига келди. У ерда оммавий ҳибсга олишлар бўлиб ўтди, Навальний ўтирган самолёт эса Шереметьевога қайта йўналтирилди. Қўнганидан кейин сиёсатчи қўлга олинди — «Ив Роше» иши бўйича шартли маҳкум мажбуриятларини бузганлиги учун.

18 январь куни Навальний қамаб қўйилди, суд эса тўғридан-тўғри полиция бўлимида ўтказилди. 19 январь куни Навальний томонидан ташкил қилинган Коррупцияга қарши кураш фонди (ККФ) «Путиннинг қасри» ҳақидаги фильмни эълон қилди. У 100 миллион мартадан ортиқ томоша қилинди, ижтимоий тармоқлар эса шу мавзудаги мемларга тўлиб кетди. Ҳукумат унинг қаср эмас, апарт-меҳмонхона эканлигини ва унга Путин эмас, балки унинг дўсти Аркадий Ротенберг эгалик қилишини маълум қилди.

Навальнийнинг тарафдорлари бутун Россия бўйлаб оммавий норозилик акцияларини уюштирди. 23 январь куни тўрт мингдан ортиқ, 31 январь куни беш мингдан ортиқ одам ҳибсга олинди. Кўп йиллардан буён бунақаси бўлмаганди. Федерал телеканаллар «хушмуомала полициячилар» ҳақида ҳикоя қилди, аслида эса улар намойишчиларга қарши дубинка, электрошокер ва кўзни ёшлантирувчи газ қўллаган эди (Кремль буни провокацияга жавоб деб атади).

Акциялардан кейин камида 40 та жиноят иши қўзғатилди. Навальнийнинг сафдошлари Любов Собол ва Кира Ярмиш, шунингдек, сиёсатчининг укаси Олег митингда коронавирусга қарши чораларни бузганлик учун уй қамоғига ҳукм қилинди. Навальнийнинг яна бир сафдоши Леонид Волков ўсмирларни кўча акцияларига жалб қилганлик учун қидирувга берилди.

Москванинг Симонов туманлараро суди 2 февралда Навальнийни «Ив Роше» иши бўйича айбдор деб топиб, унинг жазони колонияда ўташи ҳақида қарор чиқарганди. Москва шаҳар суди 20 февралда қарорни қонуний деб топди ва суд ҳукми кучга кирди.

Навальний колонияда 2,5 йил давомида суд белгилаган жазони ўтайди.

Аввалроқ Навальнийнинг заҳарланиши юзасидан бир қанча оммавий ахборот воситалари журналистларининг биргаликда олиб борган суриштируви «Янгиликлар дастуридаги суриштирув-репортаж» номинацияси бўйича Америка телевидениесининг «Эмми» мукофотига сазовор бўлганди.