Эфиопиянинг шимоли-шарқидаги Афар минтақасида олиб борилган кўп йиллик археологик тадқиқотлар давомида қадимий тошқотган тишлар топилди. Олимларнинг фаразича, бу тишлар 2,6–2,8 миллион йил аввал айнан шу ерда икки хил инсон аждоди яшаганини кўрсатади. Қизиғи шундаки, улардан бири илм-фанга ҳали номаълум бўлган янги тур бўлиши мумкин. Бу ҳақда CNN хабар берди.
Маълум қилинишича, 2015 йилда топилган 3 та тиш ҳомо турига мансуб бўлса, 2018–2020 йилларда аниқланган 10 та тиш австралопитек турига тегишли экани қайд этилган. Тадқиқот натижалари Nature журналида чоп этилган.
Олимларнинг қайд этишича, бундай бир даврда икки хил турнинг ёнма-ён яшаганини кўрсатувчи топилмалар жуда кам учрайди. Илгари ҳомо тури (ҳозирги замонавий одам) австралопитекдан кейин пайдо бўлгани тахмин қилинарди.
“Икки тур бир вақтда бир жойда яшаганини аниқладик. Инсон эволюцияси тўғри чизиқ эмас, балки сершох дарахтга ўхшайди”, деди тадқиқот муаллифларидан бири Кае Рид.
Унинг таъкидлашича, айрим турлар йўқолиб кетган, бошқалари эса макон ва замонга мослашган, ҳатто баъзиларининг кейинчалик бошқа турлар билан аралашиб кетгани ҳам маълум. Машҳур “Люси” номи билан танилган австралопитек афаренсис ҳам илк одам аждодларидан биридир. Бундай одам қолдиқлари ҳам 1974 йилда Эфиопияда топилган бўлиб, инсониятнинг қадимий аждодлари тик туриб юрганини исботлаб берган эди. Янги топилган тишлар эса “Люси”дан кейинги даврда яшаган, аммо ҳозиргача номаълум бўлган янги австралопитек турига тегишли бўлиши мумкин.
Афар минтақаси олимлар учун қадимий одамзод тарихи бўйича энг муҳим ҳудудлардан бири ҳисобланади. Бу ерда қадимий тош қуроллар, турли ҳайвонлар қолдиқлари ва инсон аждодларига оид кўплаб топилмалар аниқланган. Ҳудуд геологик жиҳатдан ҳам ноёб: тектоник плиталар ҳаракати сабаб ернинг қадимий қатламлари очилиб, деярли 5 миллион йиллик тарихни ўрганиш имконини бермоқда.
Мутахассисларнинг айтишича, ҳозирча фақат тишлар топилгани боис аниқ янги тур деб эълон қилишга эрта. Аммо кейинги қазилмалар давомида бошқа суяк қисмлари топилса, инсон эволюциясидаги энг сирли даврлардан бири — 3 миллиондан 2 миллион йилгача бўлган давр янада ойдинлашиши мумкин. Шу тариқа, Афарда топилган тишлар инсоният келиб чиқиши ҳақидаги катта саволларга жавоб излашда муҳим далил бўлиб хизмат қилмоқда.
Изоҳ (0)