Одатда санъат соҳасига қадам қўяётган инсонларнинг кўпчилиги тезроқ танилиш ва жўшқин ижод қилиш истагида Тошкент шаҳрида қолишга интилади. Аммо ўзи туғилиб, вояга етган вилоятда яшаб, ижод намуналари орқали бутун мамлакатга танилган соҳа вакиллари ҳам йўқ эмас. «Дарё» ана шундай таниқли санъаткорларни бир саҳифага жамлади.

Шафоат Раҳматуллаева

Ўзбекистон халқ артисти Шафоат Раҳматуллаева 21 йилдирки, Қўқон мусиқали драма театрида фаолият юритади. Актриса «Масхарабоз», «Севгинатор», «Ўзимдан ўзимгача» каби кўплаб кино ва сериаллардаги роллари билан шуҳрат қозонган.

Фото: Шафоат Раҳматуллаеванинг шахсий архивидан

«Кўп йил Сирдарё вилоят мусиқали драма театрида ишладим. 2000 йили раҳматли онам касал бўлиб қолгани боис Қўқонга қайтдим ва уларни ёнида туриб, парваришладим. Волидам вафот этганидан кейин Қўқон театрига ишга кирдим. 21 йилдан бери шу даргоҳдаман.

Довон ошиб, пойтахтга бориб-келишдан завқланаман. Тошкентда кечган съёмка жараёнларини жуда тез соғинаман ва қўмсайман. Режиссёрлар  шунчалик ҳурмат қилиб чақиришса, қандай йўқ дейишим мумкин?», — дейди Шафоат Раҳматуллаева.

Фото: Шафоат Раҳматуллаеванинг шахсий архивидан

80 ёшли актриса театрда ишлаш билан бирга, Ўзбекистон давлат санъат ва маданият институтининг Фарғона минтақавий филиалида ҳам фаолият юритади.

Убайдулла Омон

Ўзбекистон халқ артисти Убайдулла Омон талабалик бахтига эришгунча, яъни 1958—1966 йилларда Бухоро вилоят мусиқали драма театрининг эски биносида ижод қилган. Ҳозирги Ўзбекистон давлат санъат ва маданият институтини битиргач, ўша пайтдаги «Ёш гвардия» театрида режиссёр сифатида фаолият бошлайди. Ёш оилага Тошкентдан икки хонали уй берилади, икки қизи ҳам пойтахтда дунёга келади.

Фото: Instagram

«Аммо бир куни нохуш хабар келди: ‘Қайнотанг оламдан ўтдилар’. Бухорога келиб, дафн маросимида қатнашдик. Қайнотамни сўнгги манзилга кузатгач, отам мени ёнларига чақириб, ‘келиннинг етти нафар укаси қолди. Уларнинг ҳаммаси мактаб ўқувчиси. Онаси ногирон. Энди сен бу оилага бош-қош бўлишинг керак. Бухорога қайтинглар. Ўғлим, бу Яратганнинг синови, бундан обрў-иззат билан чиқишинг керак’, деди.

Шундай қилиб, биз Тошкентдан Бухорога қайтдик ва аввал ишлаган театримга ишга бордим, рафиқам эса шу яқин атрофдаги туғруқхонага ишга жойлашди. Шу тариқа Бухорода қолиб кетдим», — дейди устоз санъаткор.

Убайдулла Омон рафиқаси Нилуфар Шерова билан

Фото: «Дарё»

Убайдулла Омон айни пайтда Бухоро вилоят мусиқали драма театри режиссёри сифатида ишлайди. Клип, кино ва сериаллардаги роллари билан томошабинларнинг севимли актёрига айланган санъаткор турли ижодий лойиҳалар сабаб тез-тез Тошкентга келиб кетади.

Муҳаммадсоли Юсупов

Ўзбекистон халқ артисти Муҳаммадсоли Юсуповга «Темир хотин» спектаклидаги Қўчқор роли машҳурлик олиб келган. 67 ёшли актёр узоқ йил Фарғона вилояти мусиқали драма театрида ишлаб, юзлаб спектаклларда роллар ижро этган, бош режиссёр сифатида ҳам меҳнат қилган. 2018 йили театрдан кетган актёр Фарғона шаҳридаги ихтисослашган санъат мактабида ёшларга сабоқ бериб келмоқда.

Фото: УзА

«Ижодий фаолиятим давомида бир неча бор Тошкентда ижод қилиш таклифи тушган, рад этганман. Сабаби, менга шунча имкониятлар яратган, барча ютуқларимнинг асосий сабабчиси — Фарғонадаги театрни ташлаб кетишга ҳаддим сиғмайди. Шунга қарамай, тошкентлик ҳамкасбларим билан муносабатларим жуда яхши. ‘Ўзбекфильм’ ва театрлар билан ҳамкорликни жуда яхши йўлга қўйганман. Гап қаерда ишлашда эмас, ишни қай даражада бажариб беришда, деб биламан», — дейди Муҳаммадсоли Юсупов.

Санобар Раҳмонова

Оддий чўпон оиласида туғилиб, ўқувчилик давридаёқ машҳурликка эришган хонанда Санобар Раҳмоновани, асосан, катта авлод вакиллари яхши танийди.

Фото: Санобар Раҳмонованинг шахсий архивидан

13 ёшида «Устозлар», «Қишлоқларимдан» сингари тароналари билан тингловчилар қалбига кириб борган Санобар Раҳмонова ҳалигача Андижон вилоятининг Асака туманида яшаб, ижод қилади.

Оиласи туфайли маълум муддат ижодда танаффус қилган хонанда пойтахтда яшаб, фаолият юритмаслигига ҳам сабаб шахсий ҳаёти эканлигини таъкидлайди.

«Оилани азиз ва улуғ эканлигини англаб, санъатни шахсий ҳаётимга алмаштирдим. Кўпроқ вақтимни фарзандлар тарбияси билан ўтказдим. Турмуш ўртоғим оилада саккиз фарзанднинг кенжаси. Кексайиб қолган қайнонам ва қайнотамнинг ёнларида бўлиб, уларнинг дуоларини олишга қарор қилганмиз. Аллоҳга беадад шукрлар бўлсинки, уларнинг дуоларини олиб, кам бўлмадим. Тўрт фарзандни тарбиялаб, вояга етказдик. Умр йўлдошим Илҳом ака Жўраев ва кенжа ўғлим Ихлосбек ҳамкасбим. 2006 йилда оилавий гуруҳ ташкил этдик.

Санобар Раҳмонова умр йўлдоши Илҳом Жўраев ва кенжа ўғли Ихлосбек Жўраев билан

Фото: Шахсий архив

Талабалик давримизда турмуш ўртоғим иккимизга пойтахтда ўқиб, ижод қилиш таклифи тушган. Лекин юқорида айтганимдек, биз қайнона-қайнотамни ёлғиз қолдиргимиз келмасдан, рози бўлмаганмиз», — дейди Санобар Раҳмонова.

Отабек Муҳаммадзоҳид

Жонли ижродаги қўшиқлари билан кўпчиликнинг меҳрини қозонган хонанда Отабек Муҳаммадзоҳид Фарғона шаҳрида яшаса-да, Ўзбекистоннинг барча ҳудудида ўз мухлисларига эга. У ҳам давлат тадбирлари ва тўй хизматлари сабаб Тошкент шаҳри ҳамда бошқа вилоятларга тез-тез бориб туради.

Фото: Instagram

Хонанда айни пайтда Ўзбекистон давлат филармонияси Фарғона вилоят бўлими раҳбари лавозимида ҳам фаолият юритади.

Тўлқин Жабборов

Ўзбекистонда хизмат кўрсатган артист Тўлқин Жабборов ҳам вилоятда яшаб, элга танилган санъаткорлардан. У пойтахтда бўлиб ўтадиган турли давлат тадбирларида Хоразм вилояти вакили сифатида иштирок этиб келади.

Фото: Instagram

Тўлқин Жабборов воҳада истиқомат қилса-да, Халқлар дўстлиги санъат саройида концерт дастурларини намойиш қилади.

Жаноб Расул

Фото: Instagram

«Ёмонсан», «Captiva», «Тамара» каби ёшларбоп тароналари билан танилган Жаноб Расул Қорақалпоғистоннинг Беруний шаҳрида яшайди. Тошкент шаҳрига тез-тез келиб турадиган хонанданинг қўшиқлари, асосан, интернет орқали оммалашган.

Фарғоналик машҳурлар

Коллаж: «Дарё»

«Сени соғинмоқ», «Талабалик даврим менинг», «Аскар» каби қўшиқлари орқали танилган Ўзбекистон халқ ҳофизи Илҳом Иброҳимов, «Мен ўзимни севаман», «Масхарабоз», «Зебожон» сингари қўшиқлар ижрочиси, хонанда Тоҳир Маҳкамов, «Ўшал дамлар» таронаси орқали машҳурликка эришган Ўзбекистонда хизмат кўрсатган артист Яҳёбек Мўминов ва унинг акаси Муҳсинбек Мўминов ҳамда «Кечиккан севгим», «Гўзалим, бир кеча» каби ҳит қўшиқлар куйчиси Абдужалил Қўқоновни нафақат водийда, балки Ўзбекистоннинг бошқа ҳудудларида ҳам ўз мухлислари бор.

Тошпўлат Маткаримов

90 йилларда «Санамжон», «Армон», «Оқ тулпор» каби қўшиқлари билан шуҳрат қозонган Ўзбекистонда хизмат кўрсатган артист Тошпўлат Маткаримов Тошкент вилоятида яшаб, танилган.

Фото: Instagram

У ҳозирда Оҳангарон шаҳридаги «Қурама» фолклор-этнографик халқ ансамбли раҳбари сифатида меҳнат қилмоқда.

Ёқуб Аҳмедов

«Ўгай она», «Турист», «Салом севги, хайр севги», «Заҳарли томчилар», «Бахт овчиси» каби ўнлаб кино ва сериаллар орқали актёр сифатида танилган Ёқуб Аҳмедов Наманган шаҳрида яшайди.

Фото: Instagram

Таниқли футболчи Одил Аҳмедовнинг акаси ҳисобланган Ёқуб Аҳмедов, асосан, тадбиркорлик фаолияти билан шуғулланади. У Халқ депутатлари Наманган вилоят кенгаши депутати ҳамдир.

Миролим Исажонов тайёрлади