Ҳиндистонда «омикрон» штаммидан биринчи ўлим қайд этилди

Ҳиндистонда Соғлиқни сақлаш вазирлиги коронавируснинг янги «омикрон» штаммидан вафот этган биринчи бемор ҳақида хабар берди, деб ёзмоқда BBC.

Маълум бўлишича, янги штамм билан касалланиш оқибатида 74 ёшли эркак вафот этган. Бемор 15 декабрь куни Удайпур шаҳридаги касалхонага ётқизилган ва орадан 15 кун ўтиб вафот этган. Шифокорлар эркак коронавирусга қарши тўлиқ эмланганини айтди.

«Техник жиҳатдан бу ‘омикрон’ билан боғлиқ ўлим. Шу билан бирга, марҳум қандли диабет ва унга боғлиқ касалликлар билан оғриган кекса одам эди», — деди Ҳиндистон Соғлиқни сақлаш вазирлиги котиби Лав Агарвал.

Ҳиндистонда ўтган бир кеча-кундузда коронавирусдан 325 та ўлим қайд этилган, улардан фақат биттаси «омикрон» штамми билан боғлиқ. 6 январь ҳолатига кўра, бир суткада Ҳиндистонда 90,000 дан ортиқ кишида коронавирус қайд этилган. Мутахассисларнинг фикрича, касалланишнинг ортишига янги штамм сабаб бўлмоқда.

Пандемия бошланганидан бери Ҳиндистонда жами 35 миллиондан ортиқ киши коронавирусга чалинган, улардан 482 мингга яқини инфекция қурбони бўлган.

Аввалроқ Жанубий Кореяда, Австралияда, Германияда ва АҚШда  «омикрон» билан боғлиқ биринчи ўлим ҳолатлари кузатилганди. Шунингдек, Борис Жонсон Британияда «омикрон» штамми билан касалланган бемор вафот этганини маълум қилганди.