Қозоғистонда банкларнинг барчаси ишлашдан вақтинчалик тўхтади. Бу ҳақда республика Миллий банкининг расмий вакили Олжас Рамазоновга таяниб, «Интерфакс» хабар берди.
Рамазоновнинг сўзларига кўра, «ҳуқуқ-тартибот идоралари томонидан аксилтеррор операциялар ўтказилаётгани ҳамда интернет ишидаги вақтинчалик узилишлар ҳисобга олинган ҳолда, шунингдек, молия институтлари ходимлари ва молиявий хизматлар истеъмолчиларининг саломатлиги ҳамда ҳаётини ҳимоя қилиш учун барча молия ташкилотларининг фаолияти вақтинча тўхтатилган.
Қозоғистонда интернет узилгани сабабли 5 январдан нақд пулсиз тўловларни амалга оширишнинг иложи бўлмаяпти.
NetBlocks сервиси маълумотларига кўра, Қозоғистон бўйлаб интернет узиб қўйилган. Мобил алоқа ҳам деярли ишламаяпти. Шунингдек, бир қанча телеканалларнинг эфири тўхтатилган.
Қозоғистондаги бир қанча завод, фабрика ва корхоналар ҳам фаолиятини тўхтатган, хусусан, Қорағанда вилояти Балхаш шаҳридаги Металлургия заводи ҳам ёпилган.
5 январь куни Қозоғистон ҳукумати бутун мамлакат бўйлаб фавқулодда ҳолат эълон қилди.
Қозоғистондаги вазият 2 январь куни Жанаўзен шаҳрида (Манғистау вилоятидаги шаҳар) суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди.
Қозоғистон президенти Қосим-Жўмарт Тўқаев мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини айтди.
Изоҳ (0)