Hindistonda “omikron” shtammidan birinchi o‘lim qayd etildi

Hindistonda Sog‘liqni saqlash vazirligi koronavirusning yangi “omikron” shtammidan vafot etgan birinchi bemor haqida xabar berdi, deb yozmoqda BBC.

Ma’lum bo‘lishicha, yangi shtamm bilan kasallanish oqibatida 74 yoshli erkak vafot etgan. Bemor 15-dekabr kuni Udaypur shahridagi kasalxonaga yotqizilgan va oradan 15 kun o‘tib vafot etgan. Shifokorlar erkak koronavirusga qarshi to‘liq emlanganini aytdi.

“Texnik jihatdan bu ‘omikron’ bilan bog‘liq o‘lim. Shu bilan birga, marhum qandli diabet va unga bog‘liq kasalliklar bilan og‘rigan keksa odam edi”, — dedi Hindiston Sog‘liqni saqlash vazirligi kotibi Lav Agarval.

Hindistonda o‘tgan bir kecha-kunduzda koronavirusdan 325 ta o‘lim qayd etilgan, ulardan faqat bittasi “omikron” shtammi bilan bog‘liq. 6-yanvar holatiga ko‘ra, bir sutkada Hindistonda 90,000 dan ortiq kishida koronavirus qayd etilgan. Mutaxassislarning fikricha, kasallanishning ortishiga yangi shtamm sabab bo‘lmoqda.

Pandemiya boshlanganidan beri Hindistonda jami 35 milliondan ortiq kishi koronavirusga chalingan, ulardan 482 mingga yaqini infeksiya qurboni bo‘lgan.

Avvalroq Janubiy Koreyada, Avstraliyada, Germaniyada va AQShda  “omikron” bilan bog‘liq birinchi o‘lim holatlari kuzatilgandi. Shuningdek, Boris Jonson Britaniyada “omikron” shtammi bilan kasallangan bemor vafot etganini ma’lum qilgandi.