Италияда 50 ёшдан ошганлар учун коронавирусга қарши мажбурий вакцинация жорий қилинди. Тегишли буйруқ 5 январь куни ҳукумат йиғилишида тасдиқланди, деб ёзмоқда Reuters.
Мамлакатда 50 ёшдан ошган ишчилардан эмланганини ёки яқинда COVID-19 дан тузалганини тасдиқловчи тиббий купонларни кўрсатиш талаб қилинади. Акс ҳолда, улар февраль ойининг ўрталарида ишдан четлатилиши мумкин. Бунгача эмланмаган одамлар ҳар икки кунда COVID-19 га топширган тестининг манфий натижасини тақдим этгандагина ишга чиқиши мумкин эди.
«Ёши 50 дан ошган ва ишламайдиганлар эмланиши ёки чекловлар остида бўлиши керак», — дея огоҳлантирди ҳукумат.
Италия бош вазири Марио Драгининг тушунтиришича, ҳукумат эътиборини 50 ёшдан ошган одамларга йўналтирмоқда, чунки улар касалхонага ётқизиш хавфи юқори бўлганлар тоифасига киради. Уларни вакцинациядан ўтказиш, шунингдек, касалхоналардаги босимни енгиллаштириш ва одамлар ҳаётини сақлаб қолиш учун ҳам зарур.
Янги қоидалар Италияда кунлик коронавирусга чалиниш ҳолатлари рекорд даражага — 170 000 тага чиққани, инфекциядан ўлимлар 2020 йилнинг баҳоридан бери энг юқори даражага етганидан сўнг қабул қилинган.
Декабрь ойида Исроил ҳукумати коронавируснинг тез тарқалаётган янги «омикрон» штаммига қарши курашиш учун 60 ёшдан ошган фуқароларнинг барчасига вакцинанинг тўртинчи дозасини олишни тавсия қилганди. Туркияда вакцинанинг тўртта дозасини олган кишиларни бешинчи доза билан эмлашга рухсат берилган.
Аввалроқ Хитой ҳукумати 1,2 миллион аҳолига эга Ючжоу шаҳрини локдаунга ёпганди, у ерда 3 кишида коронавирус аниқланган. Шунингдек, Таиланд чет эллик сайёҳлар учун деярли барча туристик манзилларини ёпгани хабар қилинганди.
Изоҳ (0)