Қозоғистон ҳукумати мамлакатда ёқилғи нархларини ярим йилга пасайтирди

Қозоғистонда бензин, дизель ёқилғиси ва автомобиль гази нархларини 180 кунга давлат томонидан тартибга солиш белгиланди. Бу ҳақда ҳукумат хабарига таяниб, Tengrinews хабар берди.

Автомобиль газининг максимал нархлари қуйидагича белгилаб қўйилган:

• Актўбе, Атирау ва Манғистов вилоятларида — бир литри учун 50-55 тенге (1240-1360 сўм);
• Чимкент, Шарқий Қозоғистон, Жамбил, Ғарбий Қозоғистон, Қизилўрда ва Туркистон вилоятларида — бир литри учун 60-65 тенге (1490-1610 сўм);
• Олмаотада — бир литри учун 65 тенге (1610 сўм);
• Нурсултонда — бир литри учун 70 тенге (1740 сўм).

Шунингдек, бензин нархлари вақтинча чекланган:

• Аи-80 — бир литри учун 89 тенге (2200 сўм);
• Аи-92 ва Аи-93 — бир литри учун 182 тенге (4500 сўм);
• Аи-95 — бир литри учун 215 тенге (5300 сўм).

Ақмўла, Актўбе, Шарқий Қозоғистон, Ғарбий Қозоғистон, Костанай ва Шимолий Қозоғистон вилоятларида дизель учун белгиланган максимал нарх — 260 тенге (6460 сўм), Қозоғистоннинг қолган вилоятларида эса бир литри учун 240 тенге (5960 сўм) этиб белгиланди.Қозоғистондаги вазият 2 январь куни Жанаўзен шаҳрида (Манғистов вилоятидаги шаҳар) суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4- ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди.

Қозоғистон президенти Қосим-Жўмарт Тўқаев мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини айтди.