АҚШ Давлат департаменти Қозоғистон ҳукумати ва норозилик намойишчиларини мамлакатида фавқулодда ҳолат эълон қилиниши оқибатида юзага келган вазиятдан чиқишга биргаликда ечим топишга чақирди.
«АҚШ қимматли ҳамкоримиз ҳисобланувчи Қозоғистондаги вазиятни диққат билан кузатиб бормоқда. Биз зўравонлик актлари ва мулкларни яксон қилинишини қоралаймиз ҳамда ҳукуматни, ҳам намойишчиларни вазмин бўлишга чақирамиз», — дейилади Давлат департаменти вакили Нед Прайснинг расмий баёнотида.
«Биз томонларнинг барчасини фавқулодда вазиятдан чиқишнинг тинч ечимини топишга чақирамиз», — дейилади баёнотда.
Қозоғистонда норозилик намойишлари суюлтирилган газ нархи икки бараварга (60 тенгедан 120 тенгега) кўтарилганидан сўнг бошланди. 4 январь куни Қозоғистонда полиция ҳамда газ нархининг кескин ошганига қарши чиқаётган намойишчилар ўртасида тўқнашувлар кузатилди.
Кейинчалик газ нархи туширилгани маълум қилинди. Қозоғистон президенти Қосим-Жўмарт Тўқаев намойиш ўтказаётганлардан провокацияга учмасликни сўраган, митинг ўтказишнинг ҳам ўз қонун-қоидалари борлигини, айниқса ҳиссиётга бериладиган ёшлар қалтис ва қонунга зид ҳаракатлар билан ўз келажагига салбий таъсир кўрсатиб қўйиши мумкинлиги ҳақида огоҳлантирган.
Мамлакатда вазият барибир кескинлашишда давом этди ва Қозоғистон президенти ҳукумат истеъфосини қабул қилди. 5 январнинг иккинчи ярмида Тўқаев Қозоғистон халқига яна видеомурожаат йўллади ва Хавфсизлик кенгаши раисининг ваколатларини ҳам қабул қилиб олгани, мамлакатдаги намойишлар ортида молиявий қўллаб-қувватланаётган фитначилар турганини маълум қилди.
Тўқаев фуқароларга йўллаган мурожаатида мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини ҳам айтган.
Изоҳ (0)