Қозоғистон президенти Қосим-Жўмарт Тўқаев мамлакат халқига мурожаати йўллаб республика Хавфсизлик кенгашига раҳбарлик қилишини билдирди. Бу ҳақда «Tengrinews.kz» хабар берди.
Аввал мазкур лавозимда Қозоғистоннинг биринчи президенти Нурсултон Назарбоев фаолият олиб борарди ва у умрининг охиригача мазкур лавозим ваколатларига эга эди. Тўқаев бу ҳақда Қозоғистон халқига йўллаган видеомурожаатида маълум қилган.
Тўқаевнинг сўзларига кўра, Қозоғистондаги намойишлар ортида «молиявий жиҳатдан мотивларга эга кимсалар» турибди ва уларнинг бу борада «пухта ишлаб чиқилган режаси» бор.
«Шунинг учун давлат раҳбари сифатида бугуннинг ўзида Хавфсизлик кенгаши раҳбарлигини қабул қиламан», — дея таъкидлаган Тўқаев.
Шунингдек, у ўзининг мамлакатдан қочиб кетганлиги ҳақидаги хабарларни инкор қилган.
«Нима бўлишидан қатъи назар, пойтахтда қоламан. Тез орада Қозоғистонда янги сиёсий трансформацияни амалга ошириш юзасидан ўз таклифларим билан чиқиш қиламан. Босқичма-босқич ислоҳотларни давом эттириш бўйича ўз позициямда қоламан», — деган Қозоғистон президенти.
Нурсултон Назарбоев 2019 йилда Қозоғистон президентлигидан кетиб, Хавфсизлик кенгаши раҳбарига айланганди.
«Бу Назарбоевда раҳбарлик ваколатини сақлаб турган охирги лавозим эди. Энди Тўқаев Қозоғистонда расман барча асосий тузилмалар бошқарув ваколатларига эга», — дея қайд этган «РБК» эксперти, Москва давлат университети Собиқ иттифоқ давлатларида ижтимоий-сиёсий жараёнларни ўрганиш ахборот-таҳлил маркази директори Дарё Чижова.
2021 йил апрелида Назарбоев Қозоғистон халқ ассамблеяси раҳбарлигидан, ўша йили ноябрь ойида эса «Нур Отан» партияси раҳбарлигидан кетган.
Изоҳ (0)