Ўзбекистонда нодавлат мактабгача таълим ташкилотлари ва мактабларга фарзандларини юбораётган ота-оналар даромад солиғидан озод этилиши мумкин. Бу ҳақда «Янги Ўзбекистоннинг 2022–2026 йилларга мўлжалланган тараққиёт стратегияси тўғрисида»ги президент фармони лойиҳасида сўз боради.
Тараққиёт стратегиясида таълим сифатини ошириш бўйича 2022 йилда амалга оширилиши белгиланган вазифалар ҳам мавжуд. Хусусан, 1 апрелдан бошлаб нодавлат мактабгача таълим ташкилотлари ва мактабларга фарзандларини юбораётган ота-оналарнинг 3 миллион сўмгача бўлган тўловлари даромад солиғидан озод этилади.
Фармон лойиҳасида Молия вазирлигига Давлат солиқ қўмитаси билан биргаликда бир ой муддатда Солиқ кодекси ва бошқа қонунчилик ҳужжатларига тегишли ўзгартириш киритишни назарда тутувчи лойиҳаларни Вазирлар Маҳкамасига киритиш юкланган.
Шунингдек, ўрта таълим тизимини замон талабларига мослаштириш мақсадида умумий ўрта таълим муассасаларида дарсликларни янгилаш дастурини амалга ошириш учун давлат бюджетидан 605 миллиард сўм ажратилади. Бундан ташқари, 141 мингта янги ўқув ўринлари яратилиб, уларнинг сони 2026 йил якунига қадар 1,2 миллионгача етказилади.
Шунингдек, 2022–2026 йилларга мўлжалланган тараққиёт стратегиясини 2022 йилда амалга ошириш бўйича «йўл харитаси» лойиҳасида келтирилишича, 2022 йил якунига қадар 6 ёшли болаларни мактабгача тайёрлов тизими билан қамраб олиш даражасини 90 фоизга етказилади. Давлат мактабгача таълим ташкилотларида қуйидаги гуруҳлар ташкил қилинади: тўлиқ кунлик гуруҳлар; қисқа муддатли гуруҳлар; мажбурий бепул тайёрлов гуруҳлари.
Мактабгача таълим тизимига хусусий сектор маблағларини жалб қилиш орқали янги нодавлат мактабгача таълим ташкилотлари ташкил этилади. 2022 йилда давлат-хусусий шерикчилиги асосидаги 1300 та нодавлат мактабгача таълим ташкилотлари ҳамда оилавий мактабгача таълим ташкилотлари фаолияти йўлга қўйилади.
Бундан ташқари, Мактабгача таълим тизимида таълим сифатини янги босқичга олиб чиқиш ҳам кўзда тутилган. Боғча ходимларининг профессионал тайёргарлиги ва маҳоратини ошириб боришнинг такомиллаштирилган тизими жорий этилади. Мактабгача таълим тизими ходимларининг малакасини ошириш шакл ва методикалари халқаро тажриба асосида қайта кўриб чиқилади.
Ҳудудларда давлат ва нодавлат мактабгача таълим ташкилотлари раҳбар ва педагог кадрларининг кредит-модуль тизимига асосланган узлуксиз малака ошириш тизими жорий этилади. Мактабгача таълим тизими бошқарув кадрлари захирасини мақсадли ўқитиш тизими йўлга қўйилади.
Эслатиб ўтамиз, 2021 йилнинг октябрь ойида Шавкат Мирзиёев Тошкент шаҳри аҳоли билан учрашувда пойтахт мактабларидаги таълим сифати ва болалар тарбияси масаласига тўхталиб ўтганди. Ўшанда давлат раҳбари айрим шаҳар мактабларида битта синфда 45-50 тагача бола ўқиётганидан, давлат боғчасига фарзандини бераман деб, ойлаб, ҳатто йиллаб навбат кутаётган оилалар ҳам борлигидан яхши хабардор эканини маълум қилган. Шу сабаб Шавкат Мирзиёев президентлик дастури доирасида фарзандларини хусусий боғча ва мактабга берган ота-оналарга енгилликлар бериш таклифини билдирган эди.
Изоҳ (0)