28 декабрь куни Тожикистон раҳбари Эмомали Раҳмон тўртинчи бор мамлакат Миллий олимпия қўмитаси президенти этиб сайланди, деб хабар беради Asia-Plus.
Миллий олимпия қўмитаси матбуот хизматининг маълум қилишича, Абдулло Раҳмонзода ва Дилшод Назаров қўмитанинг вице-президентлари этиб сайланган, Муҳаммадшо Абдуллозода эса бош котиби сифатида қолган.
Мамлакатнинг МОҚ ижроия қўмитаси таркибидан Екатерина Измайлова, Шоҳида Қаландарова, Абдулло Маҳмадализода, Ҳусайнжон Саидов ва Нигина Хайруллоева ўрин олган.
Бош ассамблея йиғилиши иштирокчилари, шунингдек, Тожикистон Миллий олимпия қўмитасининг 2017—2021 йиллардаги фаолиятига оид ҳисоботни эшитган. Таъкидланишича, ўтган давр мобайнида 28 нафар спортчи молиявий кўмак олган — Токио-2020 Олимпиада ўйинларида ушбу дастурнинг умумий қиймати 278,8 минг долларни ташкил этган.
Спортчиларнинг турли халқаро турнирлардаги иштироки ҳақида сўз борар экан, ҳисобот даврида тожикистонликлар Ислом бирдамлик ўйинларида 3 та бронза, Ёпиқ биноларда ва жанг санъатлари бўйича Осиё ўйинларида 51 та (3 та олтин, 14 та кумуш, 34 та бронза), шунингдек, Осиё ўйинларида 7 та (4 та кумуш, 3 та бронза) медалларни қўлга киритгани маълум қилинган.
Эслатиб ўтамиз, Эмомали Раҳмон 2020 йилнинг 11 октябрь куни бўлиб ўтган республика раҳбарлигига сайловларда овозларнинг 90,92 фоизини тўплаган эди. Октябрь охирида эса бешинчи марта Тожикистон президенти этиб сайланган Эмомали Раҳмон конституцияга ва мамлакат халқига содиқликка қасамёд қилганди.
Изоҳ (0)