АҚШ президенти Жо Байден Эрон билан боғлиқ ядро битими вазиятида дипломатияга устунлик бермоқда. Бу ҳақда Давлат департаменти вакилига таяниб, «Коммерсантъ» хабар берди. Давлат раҳбари музокаралар муваффақиятсиз ўтса, «бошқа вариантларни» кўриб чиқади.
«Президент Байден Эрон ядро қуролига эга бўлишига йўл қўймаслигини аниқ айтди ва шубҳасиз, дипломатияни устувор ҳамда биринчи вариант деб ҳисоблайди, қолган вариантлар эса бу муваффақиятга эришилмаса, кўриб чиқилади», — дейди Давлат департаменти вакили Венадаги консультация натижалари бўйича ўтказилган телефон брифингида.
Вашингтоннинг ҳисоблашича, ядро битими борасидаги натижалар «бўлиши мумкин бўлган ҳолатдан яхши, бироқ кутилганидан ёмонроқ». Давлат департаменти вакилининг таъкидлашича, музокара иштирокчилари музокараларнинг асосига айланиши мумкин бўлган битим матни бўйича умумий фикрга келган. АҚШ йил охирига қадар музокараларни қайта тиклаш ниятида.
АҚШ президентининг миллий хавфсизлик бўйича ёрдамчиси Жейк Салливан олдинроқ ядро битимига қайтиш «ўзлари хоҳлаганидан кўра» қийинроқ бўлганини айтганди. «Биз 2018 йилдаги битимдан чиқиш борасидаги қарорнинг товонини тўляпмиз», — дея қўшимча қилган.
Салливан Россия билан ҳамкорликни конструктив деб атаган. Унинг фикрича, дипломатия Эронга ядровий қуролни қўлга киритишига йўл қўймасликнинг энг яхши йўли.
Аввалроқ Эрон ядро дастури иштирокчиларига ядровий мажбуриятлар ва АҚШ санкцияларини бекор қилиш юзасидан ўз таклифларни топширгани хабар қилинганди. Таъкидлаш керакки, АҚШ илгари ҳам агар Эрон ядро дастурига дипломатия йўли билан қайтмаса, бошқа чоралар кўриши мумкинлигидан огоҳлантирган эди.
Изоҳ (0)