Беларусь мухолифати етакчиси Светлана Тихановская мамлакат конституциясига ўзгартириш киритиш бўйича февраль ойида ўтказиладиган референдумни тан олиш ниятида эмаслигини ва мухолифат томонидан амалдор ҳамда куч тузилмаларини жалб этишга уринишини маълум қилди, деб хабар беради «Korrespondent.net».
Таъкидланишича, сиёсатчи ўз фикрларини «Беларусдаги демократик кучларнинг кейинги йилга мўлжалланган режалари» борасидаги онлайн муҳокамада билдириб ўтган. У ўз нутқини тугаб бораётган 2021 йилдаги статистик маълумотлар билан бошлаган.
«241 та жамоат ташкилотлари ва 40 та ОАВ ёпилди. Режим томонидан 4,5 мингдан ортиқ сиёсий важларга оид жиноят ишлари очилди, 929 киши сиёсий маҳбус сифатида тан олинди», — дейди Тихановская.
Мухолифатчи 2022 йилда «демократик» кучларнинг омади кўпроқ келишига умид билдирган. Тихановская Александр Лукашенко томонидан февраль ойига белгиланган Беларусь конституциясини ўзгартириш борасидаги референдумни тан олиш ниятида эмас, шунингдек, у мухолифат томонидан амалдорлар ва куч тузилмаларини жалб этишга уринади.
«2022 йил янгидан бирлашиш, барқарорликни ўрнатиш ва демократлаштириш жараёнини бошлаш зарур бўлган йилга айланади», — дейди у.
Беларусь мухолифатининг бошқа режалари орасида — самиздат (СССРда адабий асарлар, диний ва журналистик матнларни норасмий ҳамда цензурасиз тарқатиш усуллари) ва мамлакатни тарк этишга мажбур бўлганлар билан бирдамлик платформаларини қўллаб-қувватлаш ҳам бор.
Аввалроқ Лукашенкога Беларусь конституциясининг янги таҳрири тақдим этилгани, ўзгартиришларнинг мазмун-моҳияти давлат раҳбари, парламент ва ҳукуматнинг функция ва ваколатларини белгиловчи президентлик бошқаруви шаклини сақлаб қолишдан иборатлиги тўғрисида хабар берилганди. Парламентнинг қонун чиқарувчи функциясини тўлиқ белгилаш, унинг назорат ва кадрлар ваколатларини кенгайтириш кўзда тутилган. Бундан ташқари, ҳукумат ваколатларини ва унинг ижро ҳокимияти соҳасида қарорлар қабул қилишдаги мустақиллигини кенгайтириш таклиф этилмоқда.
Изоҳ (0)