15 декабрь куни Ашхободда Туркманистон президенти Гурбангули Бердимуҳамдеовнинг янги «Яшасин тинч ҳаёт!» номли шеърига бағишланган «Arkadagyň parahatçylyk ýörelgesi – dünýä nusgalyk görelde» («Аркадағнинг тинчлик тамойили — бу бутун дунё учун модель) номли тантанли конференция бўлиб ўтди. Бу ҳақда «Хроника Туркменистана» хабар берди.
Тадбирда маданият ва санъат соҳаси етакчилари ҳамда намояндалари, шоир ва носирлар, оммавий ахборот воситалари ходимлари, ёшлар иштирок этган.
Конференция аввалида Туркманистон Бош драма театри артистлари давлат раҳбарининг шеърини ўқиб берган.
Нашрнинг ёзишича, шеърда «миллат етакчиси адабий ёндашув асосида замонавий ҳокимият ва бахтнинг замонавий даврида нейтрал мақомнинг аҳамияти ҳақида хулосалар чиқаради».
Тадбир иштирокчиларининг таъкидлашича, «шеърда халқаро ҳарбий блоклар ва шартномаларга қўшилмаслик чақириғи таъсирчан ва лўнда янграйди».
Маълум бўлишича, президентнинг шеърига мусиқа ҳам басталанган. «Яшасин тинч ҳаёт!» қўшиғи ҳам конференцияда куйланган. Ундан ташқари «Аркадағ сиз билан» ва «Аркадағ раҳбар» қўшиқлари ҳам ижро этилган.
Аввалроқ Гурбангули Бердимуҳамедов Бетарафлик куни шарафига зиёфат уюштиргани ва унда меҳмонларга янги ёзган шеърини ўқиб бергани тўғрида хабар берилганди.
Изоҳ (0)