Наманганда Lacetti юкхонасида 150 кило истеъмолга яроқсиз гўшт олиб кетилаётгани аниқланди

Наманган вилоятида ҳеч қандай ветеринария-санитария ҳужжатларсиз гўшт маҳсулотларини олиб кетаётган Lacetti тўхтатилди, деб хабар беради ИИВ матбуот хизмати.

Маълум қилинишича, 12 декабрь куни соат 16:30 да «Наманган» ЙПХ масканига жалб этилган Наманган вилояти ИИБ ППХ ва ЖТСБ Карантин тадбирларини таъминлаш бўлинмаси ҳамда вилоят ветеринария ва чорвачиликни ривожлантириш бошқармаси ходимлари билан ҳамкорликда тадбир ўтказилган. Тадбир давомида Фарғона—Тошкент йўналишида ҳаракатланиб келаётган Қўштепа туманида яшовчи Т.Й.га тегишли бўлган Lacetti тўхтатилган.

Текширув давомида машина юкхонасида полиэтилен қопларга жойлаштирилган ҳеч қандай ветеринария-санитария ҳужжатларсиз, санитария-гигиена талабларига зид равишда номаълум шароитида тайёрланган фуқаро У.Н.га тегишли 150 килограмм гўшт маҳсулотлари олиб кетилаётгани аниқланган.

Мазкур гўшт маҳсулотлари вилоят ветеринария ва чорвачиликни ривожлантириш бўлими Озиқ-овқат маҳсулотлари хавфсизлиги микробиология ва ветеринария-санитария экспертиза лабораториясининг хулосасига кўра истеъмол учун яроқсиз деб топилган.

Ҳозирги кунда юқоридаги ҳолат юзасидан суриштирув ишларини олиб борилмоқда.

Аввалроқ Тошкентдаги «Авиасозлар» бозорида истеъмолга яроқсиз гўшт аниқлангани, Қаршида Nexia юкхонасида 250 килога яқин истеъмолга яроқсиз гўшт олиб кетилаётгани аниқланиб, йўқ қилингани, Тошкентдан Хоразмга олиб кетилаётган 1 тоннага яқин истеъмолга яроқсиз гўшт тўхтатиб қолингани тўғрисида хабар берилганди.