Қашқадарёда ишчиларидан салкам 2 млрд сўм қарздорлиги бўлган ташкилот ходимлари вилоят ҳокимлигида тўпланди

Қашқадарё вилояти ҳокимлиги биноси олдида тўпланган «Қашқадарё нефть-газ қурилиш ва таъмирлаш» ходимлари беш-олти ойдан бери маош олмай ишлаб келаётганини айтиб, ҳоким Муроджон Азимовдан ёрдам сўради. Бу ҳақда норози ишчилар билан суҳбатлашган «Дарё» мухбири хабар берди.

Маълум бўлишича, 11 декабрь куни «Қашқадарё нефть-газ қурилиш ва таъмирлаш» АЖнинг 30 нафарга яқин ишчи ходимлари вилоят ҳокимлиги олдида тўпланиб, маошсиз ишлаётгани боис оиласида муаммо юзага келганини айтиб, вилоят раҳбари билан учрашишни талаб қилган.

«Раҳбаримиз Аслиддин Раҳматов шериклари Руфат Омонов ва Қаҳрамон Султонов билан биргаликда ташкилотимизни банкрот қилди. Олти ойдан бери ойлик маош олмаймиз. Рўзғоримиз бизнинг қўлимизга қараган, аммо бизга ойлик-маош берилмаяпти. Бормаган ташкилотимиз, шикоят қилмаган раҳбаримиз қолмади. Энди вилоят ҳокими қабулига келдик», — деди «Дарё» мухбири билан суҳбатлашган ташкилот ходими Фахриддин Давлатов.

Унинг айтишича, бундан тўрт йил аввал ташкилотда 1200 дан ортиқ ишчи бўлган. Айни пайтда 100 дан ортиқ ишчи қолган, холос.

Ташкилот ишчи ходими Файзи Темировнинг айтишича, ишчилар 2021 йилнинг 8 ноябридан бери иш ташлаган.

«Ҳар сафар ойликни сўрасак, ‘бўлади-бўлади’ дея алдаб келишди. Шу боис 8 ноябрдан бери ишламаяпмиз. Бизга кимдир ёрдам берадими, дея вилоят ҳокими олдига келдик», — дейди Файзи Темиров.

Ташкилотнинг яна бир ходими Баҳром Эркаев эса ўзларига бириктирилган қурилиш ишларини вақтида бажариб келишса-да, ҳар доим «қарзингиз бор» деган баҳона қилиниб, ишчиларга моаш берилиши ортга суриб келинганини айтмоқда.

«Биз ҳар доим катта-катта қурилишларни бажарамиз. Аммо ойлик маошимизга келганда «қарзларинг бор» деб, яна ойликни беришмаяпти. Мана олти ойдирки, ойлик йўқ. Ойликсиз ишлаяпмиз», — дейди Баҳром Эркаев.

Мурожаатчиларнинг қўшимча қилишича, 11 декабрь куни ҳоким Муроджон Азимов ишчилар билан кўришган. Вилоят ҳокими ташкилот раҳбари Аслиддин Раҳматовни олдига чақиртирган ва ишчилар маошини тўлаб бериши учун уч кун муҳлат берган.

«Дарё» мухбири билан суҳбатлашган Аслиддин Раҳматов айни кунда ташкилотидаги мавжуд 212 нафар ишчисининг ойлик маошидан 1 миллиард 850 миллион сўм қарздорлиги мавжудлигини айтди.

Унинг қайд этишича, вилоят Инжиниринг компанияси буюртмачилик асосида қурилган Қарши шаҳридаги «Ватанпарварлар боғи» қурилиши учун ташкилотга тўлаб берилиши лозим бўлган 2 миллиард 700 миллион сўм маблағ ҳамон тўланмагани, ишчилари маошининг кечикишига сабаб бўлган омиллардан бири экан.

«Вилоят ҳокими беш-олти кун муҳлат берди. Шу муддат ичида муаммони ҳал қиламиз», — дейди ташкилот раҳбари Аслиддин Раҳматов.

Мурожаатчиларнинг қўшимча қилишича, 2021 йилнинг 14 декабрь куни қарздорлиги мавжуд ташкилот раҳбари Аслиддин Раҳматов ишдан олинган. Аммо муаммо ҳалигача ўз ечимини топмаган.