Jizzax viloyatining Sharof Rashidov tumanida iste’molga yaroqsiz go‘sht mahsulotlarini Toshkent viloyatiga jo‘natib turgan shaxslar aniqlandi. Bu haqda “Yoshlar” telekanalining “Yangi davr” informatsion dasturida ma’lum qilindi.

Ma’lumotlarga ko‘ra, fuqarolarning murojaatlari asosida Jizzax viloyati Ekologiya va atrof-muhitni muhofaza qilish boshqarmasi xodimlari tomonidan Sharof Rashidov tumanidagi xonadonlardan biri o‘rganilgan.

O‘rganishlar davomida tumanning “Eski toshkentlik” MFY Nurafshon ko‘chasida yashovchi ikki nafar fuqaro o‘zining hovlisida sanitariya-gigiyena talablariga zid ravishda qo‘y va mollarning ichaklari, qatqorni hamda har xil go‘shtlarni yuvib, tuzlab, Toshkent viloyatiga yetkazib berish bilan shug‘ullanishi aniqlangan.

Shuningdek, ular chorva va qoramollarni so‘yish natijasida hosil bo‘lgan chiqindilarni belgilanmagan joylarga tashlagani ma’lum bo‘lgan.

Holat yuzasidan mazkur shaxslarning har biriga nisbatan Ma’muriy javobgarlik to‘g‘risidagi kodeksning 91-moddasi 3-qismi (chiqindilar bilan bog‘liq ishlarni amalga oshirish sohasida dastlabki hisobga olish va nazorat qilish, shuningdek, chiqindilarni ko‘mish va utilizatsiya qilish joylari bo‘yicha kadastr axborotlarini taqdim etish tartibini buzish) bilan BHMning 5 barobari (1,35 million so‘m) miqdorida jarimalar qo‘llanilgan.

Avvalroq Navoiyda 160 kg go‘sht veterinariya-sanitariya talablariga zid ravishda Toshkentga olib ketilayotgani aniqlangani, Qashqadaryoda uyida eshaklarni so‘yib sotish bilan shug‘ullangan shaxsga sud hukmi o‘qilgani to‘g‘risida xabar berilgandi.