14 декабрь куни Буюк Британияда коронавирус билан касалланиш бўйича 59 610 та ҳолат қайд этилди. Бу мамлакатда 2021 йил январидан буён бир кеча-кундузда аниқланган энг юқори кўрсаткич ҳисобланади, деб хабар беради «Korrespondent.net».
Reuters агентлигининг ёзишича, бу 2020 йилнинг мартида коронавирус пандемияси бошланганидан буён Буюк Британияда суткалик касалланиш сони бўйича қайд этилган энг юқори бешинчи кўрсаткич ҳисобланади.
Бундан ташқари, ўтган бир сутка ичида тиббиёт ходимлари коронавирус инфекцияси оқибатида 150 та ўлим ҳолати юзага келганини аниқлаган. Шундай қилиб, мамлакатда COVID-19 асоратлари оқибатида вафот этганлар сони 146 627 кишига етди.
Шу муносабат билан бош вазир Борис Жонсон мамлакат «омикрон» штамми сабаб юзага келган янги инфекция тўлқинига дуч келганини таъкидлаган.
Сўнгги маълумотларга кўра, дунёда ҳозирга қадар қарийб 271,7 миллион киши коронавирусга чалинган бўлиб, уларнинг 5,3 миллиондан ортиғи вафот этган, 244,1 миллион киши соғайган.
Аввалроқ Жонсон Англияда «Б режани» жорий этганди — у одамлар уйдан туриб ишлашини, жамоат жойларида ниқоб тақиш мажбуриятини ва вакцина ҳужжатларидан фойдаланишни ўз ичига олади. Шотландия, Уэльс ва Шимолий Ирландия ўз чекловларини жорий этган. Буюк Британияда ҳозирда 3 мингдан ортиқ одамда «омикрон» штамми тасдиқланган.
Мавзуга доир: Борис Жонсон «омикрон» тўлқинидан огоҳлантирди ва барчага ревакцинация учун рухсат берди
Изоҳ (0)