Корея Халқ Демократик Республикаси (КХДР) асосчиси Ким Ир Сеннинг укаси Ким Ён Чжу 101 ёшида вафот этди. Бу ҳақда Yonhap агентлигига таяниб, «РБК» хабар берди.
Ким Ён Чжунинг ўлимига нима сабаб бўлгани очиқланмаган. Агентликнинг Корея Марказий телеграф агентлигига таяниб маълум қилишича, КХДР раҳбари Ким Чен Ин унинг ўлими муносабати билан ҳамдардлик билдирган.
«Ким Ён Чжу Меҳнат партиясининг йўналиши ва сиёсатини амалга ошириш учун фидокорона курашди, узоқ йиллар давомида партия ва давлатда муҳим лавозимларни эгаллаган ҳолда социалистик қурилишни жадаллаштириш ва давлат ижтимоий тизимининг Корея намунасини ривожлантиришга муносиб ҳисса қўшди», — дейилади хабарда.
Ким Ён Чжу 1920 йилда туғилган. Акаси Ким Ир Сеннинг бошқаруви даврида у Корея Меҳнат партиясининг Ташкилий бўлимини бошқарган, бироқ 1973 йилда унинг ўрнини Ким Ир Сеннинг ўғли Ким Чен Ир эгаллаган. Шундан сўнг, у 20 йил давомида кўриниш бермаган, аммо 1993 йилда ҳукмрон партияга Сиёсий бюро аъзоси ва Олий халқ мажлиси доимий қўмитаси раисининг ўринбосари сифатида қайтган. Ким Ён Чжу сўнгги бор КХДР давлат ОАВларида 2015 йилда кўриниш берган.
Эслатиб ўтамиз, 2017 йилнинг февралда Ким Чен Иннинг акаси Ким Чон Нам Малазияда заҳарлаб ўлдирилган эди. Кейинроқ Малайзия полицияси уни ўлдирганликда гумон қилинаётган аёлни қўлга олганди.
Изоҳ (0)