15 декабрь куни Жанубий Кореяда коронавирусга чалиниш бўйича янги ҳолатлар ва аҳволи оғир беморлар сони рекорд даражага кўтарилди, деб ёзади «Интерфакс».
Шу билан бирга, мамлакатда «омикрон» штаммига чалиниш бўйича яна тўққизта ҳолат аниқланиб, мамлакатда ушбу штамм билан касалланганларнинг умумий сони 128 нафарга етди.
Жанубий Корея бош вазири Ким Бу Гемнинг таъкидлашича, ҳукумат вируснинг тез тарқалишига қарши курашиш учун хусусий йиғилишлар иштирокчиларининг максимал сонини янада қисқартириш ва комендантлик соатларини тиклаш масаласини кўриб чиқмоқда.
«Ҳукумат ҳозирги вирусли вазиятни жуда жиддий деб ҳисоблайди ва ижтимоий масофанинг янада кучли схемасини амалга оширишни режалаштирмоқда» — деди Жанубий Корея бош вазири COVID-19 га қарши кураш бўйича ҳукумат йиғилишида.
COVID-19 га қарши курашнинг янги чоралари тафсилотлари 17 декабрь куни эълон қилиниши ва кейинги икки ҳафта ичида ишга туширилиши кутилмоқда. Ҳозирда хусусий йиғилишлар пойтахт ҳудудида олти киши ва бошқа жойларда саккиз киши билан чекланган. Янги чора-тадбирлар йиғилиш иштирокчиларининг рухсат этилган сонини тўрттага камайтириши, ресторан ва кафеларнинг ишини соат 22:00 ёки ярим тунгача чеклаши кутилмоқда.
Аввалроқ Жанубий Кореяда Ўзбекистон фуқароси «омикрон» штаммини юқтириб олгани ҳақида хабар берилганди.
Изоҳ (0)