Angliya “omikron” shtammi tarqalayotgani munosabati bilan koronavirusga qarshi kurashning “B rejasi”ga o‘tadi. Bu haqda Buyuk Britaniya bosh vaziri Boris Jonson 8-dekabr kuni e’lon qildi.
Mamlakatda 10-dekabrdan aksariyat jamoat joylarida, jumladan, kinoteatrlar, teatrlar va boshqa madaniyat muassasalarida niqoblardan foydalanish majburiy etiladi. Ushbu qoida xizmat ko‘rsatish muassasalariga tashrif buyuruvchilar yoki sport bilan shug‘ullanuvchilarga taalluqli bo‘lmaydi.
Angliya aholisiga 13-dekabrdan uydan ishlash tavsiya etildi. 15-dekabrdan boshlab tungi klublar, konsertlar va ko‘plab ommaviy tadbirlarga tashrif buyurish uchun kovid-pasport talab qilinadi. Rasmiylar, shuningdek, kasallar bilan aloqada bo‘lganlarni uy karantiniga yuborish o‘rniga, ulardan har kuni koronavirusga test olishni rejalashtirmoqda.
Hukumat ushbu chora-tadbirlar Buyuk Britaniyada “omikron” variantining tarqalishini sekinlashtirishiga umid qilmoqda. Buyuk Britaniya Sog‘liqni saqlash vazirligi rahbari Sajid Javidning ma’lum qilishicha, 8-dekabr holatiga ko‘ra, Britaniyada “omikron” shtammiga chalinish bo‘yicha 568 ta holat tasdiqlangan, yangi kasallanish holatlarining soni har ikki yarim-uch kunda ikki baravar ko‘paymoqda.
Britaniyada “omikron” shtammi tufayli 7-dekabrdan mamlakatga kirish tartibi kuchaytirilgan edi. Unga ko‘ra, mamlakatga kiruvchi 12 yoshdan kattaning barchasi PZR yoki LFD-testining(immunoxromatografik tahlil usuli bilan o‘tkaziladi) salbiy natijasini taqdim etishi kerak.
Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.
Avvalroq Gonkong universiteti saytida “omikron” shtammining elektron mikroskopdan olingan tasviri chop etilgandi.
Izoh (0)