Ўзбекистонда тез ёрдам хизматида қанча шифокор фаолият юритаётгани маълум қилинди

Ўзбекистонда тез ёрдам хизматида фаолият олиб бораётган шифокорлар сони 13 минг 798 нафарга етди. Бу ҳақда Соғлиқни сақлаш вазирлиги хабар қилди.

Маълум қилинишича, соҳани малакали врач кадрлар билан таъминланганлик даражаси эса 90,7 фоизни ташкил қилмоқда. Кўрсаткич Наманган ва Бухоро вилоятларида 100 фоиз, Самарқанд вилоятида 99 фоиз, Қорақалпоғистон ҳамда Андижон вилоятида эса 95 фоизга тенг.

Қайд этилишича, тизимда фаолият юритаётган шифокорларнинг 2316 нафари юқори малака тоифасига эга бўлса, 1186 нафари биринчи, 1088 нафари эса иккинчи тоифали мутахассислар ҳисобланади.

Шунингдек, тез ёрдам хизматида иш олиб бораётган реаниматолог-шифокорлар сони 686 нафарга етган. Бу борада энг яхши кўрсаткич Самарқанд, Бухоро ва Хоразм вилоятлари ҳиссасига тўғри келиб, мазкур ҳудудларда «103» хизмати тўлиқ ушбу мутахассислар билан таъминланган.

Бундан ташқари, соҳада меҳнат қилаётган ўрта тиббиёт ходимлари 29 минг 227 нафар, таъминланганлик даражаси эса қарийб 99 фоизни ташкил қилмоқда. Уларнинг 5411 нафари юқори малака тоифасига, 5603 нафари 10—20 йил, 3893 нафари 20 йилдан ортиқ иш стажига эга бўлган ўрта тиббиёт ходимлари ҳисобланади.

Аввалроқ Тошкент шаҳар тез ёрдам хизматига бир кунда болалар бўйича ўртача 1,5 мингга яқин чақириқ келиб тушаётгани маълум бўлганди. 1—18 ноябрь кунлари болалар бўйича 20 мингдан зиёд чақириқ келиб тушган.

Шунингдек, Зангиота туманидаги 1-сонли юқумли касалликлар шифохонасида 2021 йил бошидан буён 422 нафар чақалоқ туғилгани хабар қилинганди.

Эслатиб ўтамиз, Ўзбекистонда мактабгача таълим ташкилотлари тарбияланувчилари ҳамда умумтаълим мактабларининг 1-синф ўқувчилари гриппга қарши эмланмоқда. 3 декабрь ҳолатига кўра, мамлакат бўйлаб ташкил этилган эмлаш пунктларида 1 996 037 нафар бола гриппга қарши вакцина олган.

Ўзбекистонда 7 ой аввал бошланган коронавирусга қарши эмлаш жараёнлари давомида 99,5 фоиз тиббиёт ходимлари вирусга қарши турли босқичларда эмланиб бўлган.