Тошкентнинг Чилонзор туманида икки аёл профилактика инспектори билан жанжаллашгани акс этган видео тарқалганди. Пойтахт ИИББ мазкур ҳолат юзасидан хизмат текшируви ўтказилгани, аёллар ва профилактика инспекторлари ҳаракатларига қонуний баҳо бериш учун Чилонзор тумани прокуратурасига юборилганини маълум қилганди. Туман ҳокимлиги матбуот хизмати ҳолат юзасидан батафсил маълумот берди.
Эслатиб ўтамиз, тарқалган видеода аёллардан бири профилактика инспекторларини ҳақоратлаб, асоссиз мажбурлаб, ИИБга олиб келинганини айтгани, сўнг столдаги қоғозларни йиртиб, хонадаги буюмларни инспекторга отиб ташлагани тасвирланган. Видео изоҳида жанжаллашаётган аёллар қайсидир судьянинг уйида ишчи бўлиб ишлаши, уларни қўлга олган маҳалла инспекторлари эса қамоқда ушланаётгани айтилган.
Бундан ташқари, ҳолатга алоқадор инспектор капитан И.М.нинг онаси видеомурожаат билан чиқиб, мазкур воқеадан сўнг, унинг фарзандини қамаб қўйишганини, ёрдам сўраб қилган мурожаатлари жавобсиз қолаётганини маълум қилган.
Чилонзор тумани прокуратураси масъулларининг хабар беришича, ҳақиқатан ҳам 2021 йил 27 сентябрда аёллар Х.Ш. ва Н.С. 9 август куни соат 02:15 ларда ўзлари истиқомат қиладиган манзилга кираётганида Чилонзор туман ИИО ФМБ ходимлари уларни тўхтатиб, асоссиз айблаб, ҳақоратлаб, мажбурлаб, 3-сонли ИИБ таянч пунктига олиб борган.
Таянч пунктида уларни шаъни ва қадр-қимматини таҳқирлаб, қўлларига кишан солиб, уриб тан жароҳатлари етказиб, бир неча соатлар ушлаб туриб, камерага қамаб, уларга нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) 1-қисми билан асоссиз равишда маъмурий ҳуқуқбузарликка доир иш юритиб, тўпланган ҳужжатларни Жиноят ишлари бўйича Чилонзор тумани судига юборган.
Шунга асосан Чилонзор туман ИИО ФМБ ходимларига нисбатан Жиноят кодексининг 206-моддаси (ҳокимият ёки мансаб ваколати доирасидан четга чиқиш) 1-қисми ва 209-моддаси (мансаб сохтакорлиги) билан жиноят иши қўзғатилган.
Мазкур ҳолат юзасидан Тошкент шаҳар ИИББ Шахсий хавфсизлик бошқармаси томонидан 20 октябрда ўтказилган хизмат текшируви хулосасига кўра, Чилонзор туман ИИО ФМБ 3-сон ИИБ ҲПБ профилактика инспекторлари эгаллаб турган лавозимидан озод этилган.
7 декабрь куни Чилонзор туман ИИО ФМБ 3-сон ИИБ ҲПБ профилактика инспекторлари Жиноят кодексининг 206-моддаси 1-қисми, 234-моддаси (қонунга хилоф равишда ушлаб туриш ёки ҳибсга олиш) 2-қисми ва 235-моддаси (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) 2-қисми «в» банди билан айбланувчи тариқасида иштирок этишга жалб қилиниб, уларга нисбатан қамоққа олиш тарзидаги эҳтиёт чораси қўлланилган.
Хабарда айтилишича, ҳозирда жиноят иши юзасидан тергов ҳаракатлари олиб борилмоқда, мазкур иш бўйича суд қарори чиқарилгандан сўнг, яна қўшимча маълумотлар тақдим этилади.
Изоҳ (0)