Oktabr oyining 10 kuni ichida Toshkent shahar tez yordam xizmatiga bemor bolalar bo‘yicha jami 13 820 ta chaqiriq kelib tushgan. Bu haqda Respublika shoshilinch tibbiy yordam ilmiy markazi Toshkent shahar tez tibbiy yordam stansiyasi bosh shifokori Doniyor Bo‘riboyevga tayanib, SSV matbuot xizmati xabar berdi.
Foto: “Daryo” / Madina Nurman
Doniyor Bo‘riboyevning so‘zlariga ko‘ra, odatda kuz-qish oylari gripp va o‘tkir respirator infeksiyalarning tarqalishi uchun qulay davr hisoblanadi. Ayniqsa, bu paytda kichik yoshdagi bolalarning nafas yo‘llari yuqumli kasalliklariga chalinish ko‘rsatkichlari yilning boshqa davrlariga nisbatan anchagina ortadi.
“Qolaversa, joriy yil mamlakatda kuz faslining ilk oyi biroz salqin kelishi bu holatni yanada tezlashtirib, bolalarning gripp va o‘tkir respirator kasalliklar (O‘RK) bilan og‘irishi ko‘p kuzatilmoqda. Bu esa o‘z-o‘zidan 103 ga bo‘layotgan chaqiriqlar soni ortishiga ham sabab bo‘lmoqda”, — deydi u.
Ma’lum qilinishicha, 2021-yilning 7—17-oktabr kunlari shahar tez yordam xizmatiga bemor bolalar bo‘yicha jami chaqiriqlar soni 13 820 tani tashkil etgan. Shundan tana harorati ko‘tarilgan, O‘RVI va pnevmoniya holatlari kuzatilgan 10 474 nafar bolaga sifatli tibbiy yordam ko‘rsatilib, zotiljamga chalingan 41 nafar bola gospitalizatsiya qilingan.
“Aytish lozimki, oktabr oyining o‘tgan davri mobaynida bemor bolalar bo‘yicha shahar 103 xizmati Call-markaziga bo‘layotgan kunlik murojaatlar soni o‘rtacha 1300—1500 tani tashkil qilyotgan bo‘lsa, eng ko‘p chaqiriq 8-oktabr sanasiga to‘g‘ri kelib, shu kuni 2025 ta murojaat qabul qilindi”, — deydi Toshkent shahar tez tibbiy yordam stansiyasi bosh shifokori.
Avvalroq Zangiotadagi 1-son yuqumli kasalliklar shifoxonasida qancha bola davolanayotgani, O‘zbekistonda koronavirusning o‘rta darajasiga chalingan bemorni davolash davlat budjetiga 15 mln so‘mga tushayotgani to‘g‘risida xabar berilgandi.
