Zangiota tumanidagi 1-sonli yuqumli kasalliklar shifoxonasida 2021-yil boshidan buyon 422 nafar chaqaloq tug‘ilgan. Bu haqda shifoxona direktori o‘rinbosari Hilola Alimova Sog‘liqni saqlash vazirligiga ma’lum qildi.
Xabarda aytilishicha, bugungi kunda shifoxonada 7 nafar chaqaloq, 18 yoshgacha bo‘lgan 97 nafar bola davolanmoqda. Jonlantirish bo‘limlarida 2 nafar bemor bola shifokor va hamshiralar nazorati ostida davo muolajalarini olmoqda.
Shuningdek, bemorlar orasida 64 nafar homilador ayol ham bo‘lib, ularning 3 nafari reanimatsiya bo‘limida davolanmoqda.
Eslatib o‘tamiz, 15-oktabr holatiga ko‘ra, ushbu muassasada yil boshidan buyon tug‘ilgan chaqaloqlar soni 377 nafarni tashkil qilgan.
Avvalroq Zangiota 1-sonli yuqumli kasalliklar shifoxonasidagi PZR test tasdiqlangan va pnevmoniyaga chalingan 737 nafar bemor davolanayotgani haqida xabar qilingandi.
