Буюк Британияда коронавируснинг «омикрон» штамми билан касалланган беморлардан камида бир нафари вафот этган. Бу ҳақда мамлакат бош вазири Борис Жонсон маълум қилди.
«Афсуски, омикрон касалхонага ётқизишларни кучайтирмоқда ва афсуски, камида битта беморнинг «омикрон»дан вафот этгани тасдиқланди» — деди у. Жонсон марҳум ҳақида ҳеч қандай маълумот бермади.
Бунгача дунёда «омикрон» штаммидан бирорта ўлим ҳолати маълум эмасди.
Аввалроқ Борис Жонсон коронавируснинг янги «омикрон» штамми сабаб вояга етган барчага Янги йилга қадар ревакцинациядан ўтишга рухсат берганди. Бундан олдин ҳукумат вакцинанинг бустер дозасини одамлар январь охирига олиши мумкинлигини режалаштираётганди.
Шунингдек, Жонсон Англияда «Б режани» жорий этганди — у одамлар уйдан туриб ишлашини, жамоат жойларида ниқоб тақиш мажбуриятини ва вакцина ҳужжатларидан фойдаланишни ўз ичига олади. Шотландия, Уэльс ва Шимолий Ирландия ўз чекловларини жорий этган. Буюк Британияда ҳозирда 3 мингдан ортиқ одамда «омикрон» штамми тасдиқланган.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
ЖССТ маълумотларига кўра, «омикрон» дунёнинг 60 дан ортиқ мамлакатларида қайд этилган.
Изоҳ (0)