Бразилия шимоли-шарқида кучли ёмғир сув тошқинларини келтириб чиқарди. Оқибатда минглаб одамлар вақтинчалик бошпана излашга мажбур бўлди, камида етти киши ҳаётдан кўз юмди.
«Дам олиш кунлари Бразилиянинг шимоли-шарқидаги Бахия штатида ёмғирлар ортидан юз берган сув босиши туфайли камида етти киши ҳалок бўлди, минглаб одамлар ўз уйларини ташлаб кетди», — дейилади хабарда.
Бразилия фуқаролик мудофааси маълумотларига кўра, сув тошқинлари оқибатида 175 киши жабрланган.
«Кучли ёмғирлар бир қанча шаҳар ва қишлоқ ҳудудларини ташқи дунёдан бутунлай узиб қўйди, бу эса қутқарувчиларнинг ишини анча қийинлаштирди. Якшанба (12 декабрь) куни 200 дан ортиқ ҳарбий ўт ўчирувчилар иккита вертолёт ёрдамида одамларни қутқарди», — дея қўшимча қилди агентлик.
Ўз навбатида, Бразилия президенти ва Бахия штати губернатори зарар кўрган ҳудудларга ташриф буюрди ва уларни қайта тиклаш учун молиявий ёрдам кўрсатишга ваъда берди.
Аввалроқ Хитой шимолидаги Шанси провинциясида бир ҳафта тинмаган кучли ёмғир кенг кўламли сув тошқинларини келтириб чиқарганди. Оқибатда минтақадаги 1 миллион 760 минг кишини эвакуация қилишга тўғри келган.
Декабрь бошида Австралиянинг Квинсленд штатини сув босиб, оқибатда икки киши ҳалок бўлганди, мингга яқин киши уйларини ташлаб кетган.
Изоҳ (0)