Афғонистонда «Толибон» раҳбарияти ўзи тузган муваққат ҳукумат вазирлари, шунингдек, бошқа мансабдор шахсларга Ташқи ишлар вазирлигининг розилигисиз хорижий дипломатлар билан учрашишни тақиқлаш ҳақида қарор қабул қилди. Бу ҳақда Афғонистон Ислом Амирлигининг Twitter’даги саҳифасида эълон қилинган, деб ёзади «ТАСС».
«Афғонистон Ислом Амирлиги бош вазири (Муҳаммад Ҳасан Охунд)нинг фармонига кўра, амирлик вазирлари ҳамда мансабдор шахсларга бошқа давлатлар дипломатлари ва элчилари билан ТИВнинг протоколга масъул департаменти рухсатисиз учрашиш тақиқланади», — дейилади хабарда.
Эслатиб ўтамиз, 7 сентябрь куни «Толибон» ҳаракати Афғонистон ҳукуматининг янги таркибини эълон қилганди. Унинг қонунийлиги ҳали ҳеч қайси давлат томонидан тан олинмаган.
Ноябрь ойида «Толибон» етакчиси Ҳайбатулла Оҳунзода мамлакатнинг 34 та вилоятини 17 тасига раҳбарлар тайинлади. Шунингдек, айрим вилоятларнинг ҳокимларига ўринбосарлар ва полиция бошлиқлари ҳам тайинланган.
9 декабрь куни эса «Толибон» Афғонистон миллий армиясини шакллантиришга киришгани хабар қилинди. «Толибон» мунтазам қуролли кучларни шакллантириш учун 20 кишидан иборат махсус комиссия тузган.
«Ушбу 20 кишидан иборат қўмита мамлакат халқининг хавфсизлиги ва осойишталигини таъминлаш мақсадида Мудофаа вазирлиги таркибида ҳукумат ва исломий тизим эҳтиёжларидан келиб чиққан ҳолда имкон қадар қисқа вақт ичида фидойи, интизомли, қуролланган, ҳалол ва масъулиятли армияни шакллантиришга масъулдир», — дея хабар берди толиблар Мудофаа вазирлигининг матбуот маркази.
Изоҳ (0)