«Тошкент метрополитени» ДУК раҳбари Раҳмонбек Усмонов 3 декабрь куни метрополитен таркибий тузилмаларининг раҳбарлари билан навбатдаги йиғилишни ўтказди. Йиғилиш давомида бир қатор масалалар топшириқ сифатида масъуллар зиммасига юклатилган.
Фото: «Дарё» / Мадина Нурман
Хусусан, тирбандликларни олдини олиш, йўловчиларга қулайлик яратиш, хизмат кўрсатиш сифатини ошириш, поездлар ҳаракати оралиқ интервалларини қисқартириш мақсадида, поездлар ҳаракати жадвали қайта кўриб чиқилади.
Метрополитен барча йўналишларда тиғиз пайтларда оралиқ интервалларини максимал даражада қисқартириш ва барча имкониятлардан фойдаланган ҳолда қўшимча ҳаракат таркиблари сони кўпайтирилади.
Метрополитеннинг асосий иш фаолиятига таъсир қилмаган ҳолда «Чилонзор» электродепоси тасарруфидаги ҳаракат таркиблари техник кўрикдан ўтказилиб, ҳафта сўнггига қадар аниқланган носозликлар ва амалга оширилган ишлар юзасидан тасдиқловчи фото суратлар илова қилган ҳолда маълумот тақдим этилади.
Бундан ташқари, 2021 йилнинг сўнгги 6 ойлик даврида қайд этилган метрополитен ҳаракат таркибларининг техник носозлик туфайли линиядан четлатилганлиги ҳолатлари сони, носозлик сабаблари, носозлик қайд этилган ускуна ёки тизимлар тўғрисида таҳлилий маълумот тайёрланади.
Масъуллар, шунингдек, ерусти халқа йўли қурилиш ишларининг 2-босқичи 8-9-10-11-метро бекатиларининг қурилиш объектига қурилиш монтаж ишлар бўйича бириктирилган ишчи гуруҳнинг ҳар бир маъсул ходими томонидан қурилиш ҳолатини пухта ўрганиб, ҳафта давомида аниқланган ва аввал кўрсатилган лекин бартараф этилмаган камчиликлар бўйича маълумотлар, тасдиқловчи фото суратлари илова қилинган ҳолда шархлари билан тайёрлаб тақдим этиши лозим.
Эслатиб ўтамиз, Тошкентда ерусти метро линияларининг қурилишига 350 миллион доллардан ортиқ маблағ ажратилади. Шундан давлат бюджетидан ажратиладиган маблағлар 208,398 миллион долларни ташкил этади.
