“Toshkent metropoliteni” DUK rahbari Rahmonbek Usmonov 3-dekabr kuni metropoliten tarkibiy tuzilmalarining rahbarlari bilan navbatdagi yig‘ilishni o‘tkazdi. Yig‘ilish davomida bir qator masalalar topshiriq sifatida mas’ullar zimmasiga yuklatilgan.
Xususan, tirbandliklarni oldini olish, yo‘lovchilarga qulaylik yaratish, xizmat ko‘rsatish sifatini oshirish, poyezdlar harakati oraliq intervallarini qisqartirish maqsadida, poyezdlar harakati jadvali qayta ko‘rib chiqiladi.
Metropoliten barcha yo‘nalishlarda tig‘iz paytlarda oraliq intervallarini maksimal darajada qisqartirish va barcha imkoniyatlardan foydalangan holda qo‘shimcha harakat tarkiblari soni ko‘paytiriladi.
Metropolitenning asosiy ish faoliyatiga ta’sir qilmagan holda “Chilonzor” elektrodeposi tasarrufidagi harakat tarkiblari texnik ko‘rikdan o‘tkazilib, hafta so‘nggiga qadar aniqlangan nosozliklar va amalga oshirilgan ishlar yuzasidan tasdiqlovchi foto suratlar ilova qilgan holda ma’lumot taqdim etiladi.
Bundan tashqari, 2021-yilning so‘nggi 6 oylik davrida qayd etilgan metropoliten harakat tarkiblarining texnik nosozlik tufayli liniyadan chetlatilganligi holatlari soni, nosozlik sabablari, nosozlik qayd etilgan uskuna yoki tizimlar to‘g‘risida tahliliy ma’lumot tayyorlanadi.
Mas’ullar, shuningdek, yerusti xalqa yo‘li qurilish ishlarining 2-bosqichi 8-9-10-11-metro bekatilarining qurilish obyektiga qurilish montaj ishlar bo‘yicha biriktirilgan ishchi guruhning har bir ma’sul xodimi tomonidan qurilish holatini puxta o‘rganib, hafta davomida aniqlangan va avval ko‘rsatilgan lekin bartaraf etilmagan kamchiliklar bo‘yicha ma’lumotlar, tasdiqlovchi foto suratlari ilova qilingan holda sharxlari bilan tayyorlab taqdim etishi lozim.
Eslatib o‘tamiz, Toshkentda yerusti metro liniyalarining qurilishiga 350 million dollardan ortiq mablag‘ ajratiladi. Shundan davlat budjetidan ajratiladigan mablag‘lar 208,398 million dollarni tashkil etadi.
Izoh (0)