Filippin janubida yuk tashuvchi harbiy samolyot qulab tushishi oqibatida halok bo‘lganlar soni kamida 45 kishiga yetdi. Bu haqda mamlakat Mudofaa vazirligiga tayanib “RBK” xabar berdi.

Avvalroq vazirlik rasmiy vakili general-mayor Uilyam Gonzales halokat joyidan 29 kishining jasadi topilganini ma’lum qilgandi. Yana 17 kishi bedarak yo‘qolgan deb hisoblanilmoqda, 50 kishi kasalxonaga yotqizilgan.

Ayni vaqtda Gonzales qayd etishicha, qutqaruvchilar boshqa omon qolganlarni ham topishga umid qilmoqda. “Bu juda qayg‘uli kun bo‘ldi, lekin umidlarimizni uzib qo‘ymasligimiz kerak”, — deya qo‘shib qo‘ydi Mudofaa vazirligi vakili.

Avvalroq hukumat falokat oqibatida kamida 17 kishi halok bo‘lgani, 40 kishi kasalxonaga yotqizilganini xabar qilgandi.

Filippin Qurolli Kuchlarining C-130 Hercules samolyoti Sulu provinsiyasidagi Xolo orolida qo‘nishga kirishish chog‘ida halokatga uchradi. Samolyot mintaqada terrorizmga qarshi kurash uchun harbiy xizmatchilarni orolga olib uchgan. Mudofaa vazirligi ma’lumotlariga qaraganda, bortda 92 kishi, shu jumladan, sakkiz nafar ekipaj a’zosi, shuningdek, beshta jangovar mashina ham bo‘lgan.

Falokat joyida yong‘in boshlandi, u yerga darhol favqulodda xizmatlar yetib keldi. Harbiylar mahalliy ekstremistlarga qarshi aksilterrorchilik operatsiyasida qatnashish uchun Xologa parvoz qilayotgan edi. Mudofaa vazirligi aviahalokatning terrorchilar hujumlari bilan bog‘liq emasligini boshidan ta’kidlab o‘tgandi. Shu bilan birga, ayni paytda muassasa hodisa sabablarini o‘rganish bilan emas, balki qutqaruv operatsiyasi bilan band ekani qayd etildi.