Тожикистоннинг Хоруғ шаҳридаги митинг тарқади. Ҳокимият ва намойишчилар қандай келишувга эришди?

Тожикистоннинг Тоғли Бадахшон автоном вилояти маъмурий маркази бўлган Хоруғ шаҳрида тўрт кун давом этган норозилик акцияси якунига етди, ҳокимият ва намойишчилар ўртасида келишувга эришилди. Бу ҳақда автоном вилоят раисининг матбуот котиби Ғолиб Ниятбеков Asia-Plus’га маълум қилди.

Матбуот котибининг сўзларига кўра, келишувга эришилгач, намойишчилар тарқаган, ҳокимлик вакиллари ва кўнгиллилар марказий майдонни тартибга келтиришган.

«Намойишчиларнинг таклиф ва талаблари қабул қилинди ва улар майдонни тарк этди. Уларнинг асосий талаби Гулбиддин Зиёбековнинг қотилини жавобгарликка тортиш эди. Раис топшириғига кўра, махсус комиссия тузилиб, тергов бошланди», — дея қўшимча қилди Ғолиб Ниятбеков.

У музокаралар ва эришилган келишув тафсилотларини ошкор қилмаган, бироқ вилоят раиси Алишер Мирзонаботнинг лавозимидан четлатилиши ҳақидаги миш-мишлар асоссиз эканини қайд этган. Аввалроқ ижтимоий тармоқларда Мирзонабот ишдан бўшатилиб, Суғд вилояти бўйича Ички ишлар вазирлиги бошқармаси бошлиғи Абдулло Навжувонов тайинлангани ҳақида хабарлар тарқалган эди.

Айни вақтда, музокараларда иштирок этган манбанинг Asia-Plus’га хабар беришича, «ҳокимият 2018 йилдан буён бу ерда фаолият юритаётган барча ҳарбий хизматчиларни ҳамда Хоруғдаги воқеадан сўнг ташкил этилган қўшимча постларни олиб ташлашга ва интернет алоқасини тиклашга ваъда берган».

«Аммо Хоруғда ҳалиям интернет йўқ», — дея қўшимча қилди манба.

Аввалроқ нашрнинг Хоруғдаги манбалари берган хабарга кўра, намойишчилар, шунингдек, орган хизматларига маҳаллий аҳоли орасидан кадрлар тайинлашни, тартиб ва ​​қонунийликни таъминлаш бўйича идоралараро штабни (2018 йилда ташкил этилган) тарқатиб юборишни ва Алишер Мирзонаботовни лавозимидан четлаштиришни талаб қилган. Мирзонаботов Гулбиддин Зиёбековни қўлга олиш бўйича операцияни ўтказишда айбдор деб ҳисобланмоқда.

Бу орада NIАТ «Ховар»нинг Тоғли Бадахшондаги Хавфсизлик ва жамоат тартибини сақлаш бўйича идоралараро штабга таяниб, хабар беришича, вилоятда «прокуратура ваколатига кирадиган масалалар фуқаролик жамияти вакиллари билан ҳамкорликда Тожикистон Республикаси қонунчилигига мувофиқ текширилиб, баҳоланади ва ҳал этилади».

Шунингдек, шаҳардаги марказий проспект бўйлаб жамоат транспорти ҳаракати йўлга қўйилгани, савдо ва маиший хизмат кўрсатиш шохобчалари ўз фаолиятини давом эттираётгани хабар берилган.

Эслатиб ўтамиз, 25 ноябрь куни Хоруғ шаҳри ва шаҳар атрофи аҳолиси шаҳарнинг марказий майдонида митинг бошлаган эди. Уларнинг талаби Роштқалъа туманида яшовчи Гулбиддин Зиёбековни отиб ўлдирган орган ходимларини жавобгарликка тортиш бўлган.

Воқеа гувоҳларидан бирининг сўзларига кўра, 25 ноябрь куни соат 11:30 да Зиёбековнинг уйига ҳуқуқ-тартибот идоралари вакиллари келган. Зиёбековни ҳибсга олмоқчи бўлишганида у қаршилик кўрсатган. Бунга жавобан ОМОН ходимлари ўт очишган. Зиёбеков яраланиб, кейинчалик вафот этган.

Гулбиддин Зиёбеков бир қатор жиноятларни — уюшган гуруҳ томонидан гаровга олиш, ижтимоий, ирқий, миллий, минтақавий, диний (конфессиявий) душманликни қўзғатишни содир этганликда айбланиб, қидирувда бўлган.