Жаҳон соғлиқни сақлаш ташкилоти (ЖССТ) 28 ноябрь куни баёнот эълон қилди, унда коронавируснинг янги «омикрон» штамми ҳақидаги барча сўнгги маълумотлар келтирилган, деб ёзади Meduza.
Унда айтилишича, ЖССТда мавжуд дастлабки маълумотларга кўра, илгари коронавирусни бошдан ўтказган кишиларда «омикрон» билан қайта касалланиш хавфи юқори бўлиши мумкин.
«Дастлабки далиллар шуни кўрсатадики, ташвиш уйғотадиган бошқа штаммларга қараганда, «омикрон» билан қайта касалланиш хавфи юқори бўлиши мумкин, яъни илгари COVID-19 дан тузалган одамларда ‘омикрон’ни осон юқтириб олиш эҳтимоли кўпроқ. Аммо бу борадаги маълумотлар чекланган. Қўшимча маълумотлар келгуси кунлар ва ҳафталарда мавжуд бўлади», — дейилади ташкилот баёнотида.
Баёнотда, шунингдек, ЖССТ ҳозирча «омикрон»нинг янада юқумли экани ва коронавируснинг бошқа штаммларига, жумладан, дельтага қараганда касалликнинг оғирроқ шаклини келтириб чиқариши ҳақида аниқ маълумотларга эга эмаслиги айтилган. «Омикрон» вакцина иммунитетини қанчалик четлаб ўтишга қодирлиги ҳақида ҳам маълумот йўқ. Бунга ойдинлик киритиш учун бутун дунёда тадқиқотлар олиб борилмоқда, дейилади хабарда.
Жанубий Африка олимлари биринчи бўлиб ноябрь ойининг охирида «омикрон» штамми (дастлаб улар уни ню деб атамоқчи бўлган) пайдо бўлгани ҳақида хабар берганди. Маълум бўлишича, у жуда кўп мутацияларга эга, бу эса уни янада юқумли ва вакцинага чидамли қилиши мумкин.
Жанубий Африкадан ташқари, «омикрон» аллақачон Гонконг, Австралия ва бир қатор Ғарбий Европа мамлакатларида ҳам қайд этилди. Исроил ушбу штаммнинг тарқалишини олдини олиш мақсадида дунёда биринч бўлиб чет эл фуқаролари учун ўз чегараларини ёпиб қўйди.
Изоҳ (0)